बीड –ओबीसी आरक्षणासाठी धक्का लागू नये यासाठी ओबीसी नेत्यांकडून राज्यभर महाएल्गार सभेचं आयोजन करण्याची घोषणा करण्यात आली होती. यानंतर आज (शुक्रवार) बीडमध्ये ओबीसी समाजाच्या वतीने महाएल्गार मोर्चाचे आयोजन करण्यात आले . या मोर्चाला राज्यातील ओबीसी समाजाचे नेते उपस्थित होते,या मोर्चाला मंत्री छगन भुजबळ, आमदार धनंजय मुंडे, आमदार गोपीचंद पडळकर, ओबीसी नेते लक्ष्मण हाके यांच्यासह राज्यातील अनेक ओबीसी नेते उपस्थित आहेत. या सभेला आमदार धनंजय मुंडे यांनी संबोधीत केले. यावेळी त्यांनी मराठा आंदोलक मनोज जरांगे पाटील यांच्यावर जोरदार टीका केली.
ओबीसी महाएल्गार सभेत धनंजय मुंडे म्हणाले, मी ‘दोन अडीच महिने गप्पच होतो. मला तर बोलू द्या. आज या मी इथे उभा आहे. मी कुणाला विरोध करण्यासाठी नाही. मी इथे ओबीसींच्या आरक्षणाच्या संरक्षणासाठी उभा आहे. आमचे मार्गदर्शक, नेते भुजबळ साहेब आहेत. तुम्ही मघाशी खंत व्यक्त केली की आज मुंडे साहेब असते तर ही वेळ आली नसती. मुंडे साहेबांची बरोबरी कोणी करू शकत नाही. ओबीसी हक्कांसाठी तुम्ही हयात घातली. आज कार्यकर्ते म्हणून आम्ही इथे आहोत. अस म्हणत धनंजय मुंडे यांनी छगन भुजबळ यांच्या मागे ठामपणे उभे असल्याचे सांगितले.
पुढे बोलताना धनंजय मुंडे म्हणाले, ‘आजपर्यंत हा गावगाडा सर्व जाती धर्म अठरा पगड जातीचे सर्व लोक एकत्र नांदत होते. दोन वर्षापासून एका व्यक्तीने एका प्रवृत्तीने मी समाज म्हणत नाही, ओबीसी एससी एसटी आणि मराठा समाजात अंतर पाडायचं काम केले. हे अंतर कुठून पडलं. आज माझा मराठा समाजाला नम्र हात जोडून विनंती आहे, हे अंतर फक्त दोन समाजात अंतर पडलेले नाही. तर तुमच्याशीही तो दगाफटका करत आहे. अशी टीका त्यांनी जरांगे पाटलांचे नाव न घेता केली.
जरांगे पाटलांवर टीका करताना धनंजय मुंडे म्हणाले, याला जीआर तरी कळतो का? किती डोकेबाज माणूस समजायचं, किती डोकेबाज माणूस समजायचं. दसरा संपल्यावर म्हणतो धनगरांचं 94 चं आरक्षण काढा. याला जीआर तरी कळतो का. वंजाऱ्याचंही आरक्षण काढतो. काय काढा. द्यायचं सांगा. काहीही बोलून जमणार नाही. काही दिवस माणसं येडे करताल. पण खऱ्याला खरं आज ना उद्या कळणार आहे. आपल्याला गावगाडा सांभाळायचा आहे. आपल्याला कुणाचा द्वेष करायचा नाही. आपला संताप एक व्यक्ती आणि एका प्रवृत्तीला आहे. बाकी कुणाला नाही.
