मनोज जरांगे यांची उपस्थितीत दसरा मेळावा
बीड — नारायणगड (धाकटी पंढरी) येथे होणाऱ्या दसरा मेळाव्यासाठी येणाऱ्या भाविक आणि नागरिकांसाठी उपाय योजना करण्याची मागणी आ.संदीप क्षीरसागर यांनी केली आहे.
महंत प्रेममूर्ती ह भ.प.श्री.शिवाजी महाराज आणि संघर्षयोद्धा मनोज जरांगे यांच्या उपस्थितीत नारायणगड (धाकटी पंढरी) येथे दसरा मेळावा आयोजित करण्यात आला आहे. याठिकाणी मोठ्या संख्येने भाविक आणि नागरिक येणार आहेत. त्यामुळे पोलिस विभागाकडून वाहतूक व्यवस्था, गर्दी नियंत्रण, सुरक्षेची काटेकोर व्यवस्था, आरोग्य विभागाकडून प्राथमिक उपचार केंद्र, रुग्णवाहिका तसेच वैद्यकीय पथकांची उपलब्धता करून द्यावी, एस.टी.महामंडळाकडून अतिरिक्त बस गाड्यांची सोय व वाहतुकीची व्यवस्था करावी, तहसील कार्यालय व महसूल विभागाकडून आवश्यक शासकीय देखरेख, समन्वय, जिल्हा परिषद व ग्रामपंचायत स्तरावरून स्वच्छता, पाणीपुरवठा, विद्युत व्यवस्था व इतर सोयीसुविधा देण्यात याव्यात. तसेच संपूर्ण कार्यक्रमाचे निरीक्षण व देखरेख यासाठी संबंधित अधिकारी यांच्या वतीने अंमलबजावणी करण्यात यावी. वरील प्रमाणे सर्व संबंधित विभागांनी परस्पर समन्वय साधून आवश्यक ती कारवाई करावी जेणेकरून दसरा मेळावा शांततेत, निस्तबद्ध व यशस्वीपणे पार पडेल. सदर मेळाव्यास कोणताही अडथळा येऊ नये शिस्तबद्ध व सुरक्षित वातावरण निर्माण व्हावे यासाठी आवश्यक सर्व शासकीय उपायोजना करण्यात याव्यात या मागणीसाठी बीड जिल्हाधिकारी, पोलीस अधीक्षक बीड, मुख्य कार्यकारी अधिकारी जिल्हा परिषद, बीड, उपविभागीय अधिकारी बीड/पाटोदा, तहसीलदार बीड/ शिरूर कासार, जिल्हा आरोग्य अधिकारी बीड, जिल्हा शल्य चिकित्सक बीड,अधीक्षक अभियंता, म.रा.वि.वि.कं.ली.बीड,विभाग, नियंत्रक एस.टी महामंडळ बीड यांच्याकडे आ.संदीप क्षीरसागर यांनी पत्रकातून मागणी केली आहे.
