सातारा — फलटण उपजिल्हा रुग्णालयातील डॉक्टर तरुणीच्या आत्महत्येच्या गुन्ह्यात अटक करण्यात आलेला निलंबित उपनिरीक्षक गोपाळ बाळासाहेब बदने याला पोलीस खात्यातून बडतर्फ करण्यात आलं आहे.
कोल्हापूर परिक्षेत्राचे विशेष पोलीस महानिरीक्षक सुनील फुलारी यांनी हा आदेश काढला आहे. फलटण उपजिल्हा रुग्णालयातील एका डॉक्टर तरुणीने 23 ऑक्टोबर रोजी आत्महत्या केली होती. या तरुणीने आपल्या तळहातावर सुसाईड नोट लिहिली होती. उपनिरीक्षक गोपाल बदने याने चार वेळा अत्याचार केला आणि प्रशांत बनकर याने माझा शारीरिक व मानसिक छळ केला, असं तरुणीने नमूद केलं होतं. या घटनेमुळे संपूर्ण राज्यात मोठी खळबळ उडाली होती.
मृत तरुणीच्या कुटुंबीयांनी असा आरोप केला आहे की, पोलिसांकडून अटक करण्यात आलेल्या आरोपींना ‘फिट-अनफिट’ दाखवण्यासाठी आणि मृतांचे शवविच्छेदन अहवाल बदलण्यासाठी डॉक्टर तरुणीवर दबाव टाकला जात होता. या प्रकरणी मुख्य संशयित उपनिरीक्षक गोपाल बदने याला आधी निलंबित करण्यात आले होते. आता त्याला पोलीस सेवेतून कायमचं काढून टाकण्यात आलं आहे.
सातारचे पोलीस अधीक्षक तुषार दोशी यांनी या संदर्भात माहिती दिली. त्यांनी सांगितलं की, फलटण शहर पोलीस ठाण्यात दाखल असलेल्या गु. र.नं. ३४५/२०२५ या गुन्ह्यातील आरोपी गोपाळ बाळासाहेब बदने याने पोलीस दलाचे ज्ञान असूनही बेफिकिरीने, नैतिक अधःपतन, दुर्वर्तन आणि पदाचा गैरवापर केला. तसंच समाजात असुरक्षिततेची भावना निर्माण करणारी वर्तणूक केली. त्याचे कृत्य पोलीस उपनिरीक्षक पदाला अशोभनीय होते. त्याने कर्तव्य पालनात आणि दैनंदिन जीवनात संशयास्पद वर्तन केलं. त्याचे कृत्य अत्यंत घृणास्पद आणि निंदनीय आहे. त्यामुळे गोपाळ बाळासाहेब बदने याला शासकीय सेवेत ठेवणे योग्य नाही, असं मत त्यांनी व्यक्त केलं.
दरम्यान, निलंबित पोलीस उपनिरीक्षक गोपाळ बाळासाहेब बदने (ज्याची नेमणूक फलटण ग्रामीण पोलीस ठाण्यात होती) याला कोल्हापूर परिक्षेत्राचे विशेष पोलीस महानिरीक्षक सुनील फुलारी यांनी भारतीय राज्यघटना १९५० मधील अनुच्छेद ३११ (२) (ब) नुसार ४ नोव्हेंबर २०२५ पासून ‘शासकीय सेवेतून बडतर्फ’ केलं आहे.
