आ. विजयसिंह पंडित यांनी मानले महायुती सरकारचे आभार
गेवराई — यंदाच्या अर्थसंकल्पात गेवराई विधानसभा मतदार संघातील ७२ कोटी १६ लक्ष रुपये किंमतीच्या विविध विकास कामांना निधीची तरतुद झाली आहे. माजी आमदार अमरसिंह पंडित यांच्या मार्गदर्शनाखाली आ. विजयसिंह पंडित यांनी केलेल्या प्रयत्नांमुळे विधानसभा निवडणुक दरम्यान दिलेल्या आश्वासनांची पुर्तता करण्याचा प्रयत्न यानिमित्ताने होत आहे. रस्ते, इमारत बांधकाम यांसह सिंचन विषयक कामांचा यामध्ये समावेश आहे. आ. विजयसिंह पंडित यांनी मुख्यमंत्री देवेंद्र फडणवीस, उपमुख्यमंत्री सुनेत्रावहिणी पवार, उपमुख्यमंत्री एकनाथराव शिंदे, संबंधित विभागांचे मंत्री आणि महायुती सरकारचे आभार व्यक्त केले आहे.
गेवराई विधानसभा मतदार संघातील विविध विकास कामांना मंजुरीसह निधीची उपलब्धता व्हावी यासाठी आ. विजयसिंह पंडित सातत्याने प्रयत्नशील आहेत. माजी आमदार अमरसिंह पंडित यांच्या मार्गदर्शनाखाली त्यांनी केलेल्या प्रयत्नांमुळे यंदाच्या अर्थसंकल्पात गेवराई विधानसभा मतदार संघातील ७२ कोटी १६ लक्ष रुपये किंमतीच्या कामांना मंजुरी मिळाली आहे. सिंदफणा नदीवरील टाकळगाव बॅरेज बांधकामासाठी १९.६६ कोटी रुपये, गेवराई शहरातील न्यायालयीन इमारतीवर पहिल्या मजल्यासह ४ कोर्ट रुम बांधकामासाठी १० कोटी रुपये, घोसापूरी, ता.बीड येथे उपप्रादेशिक परिवहन अधिकारी कार्यालय बांधकामासाठी १२.५१ कोटी रुपये, नाबार्ड अंतर्गत सिरसदेवी ते काजळ्याचीवाडी रस्त्यावरील पुलाचे बांधकामासाठी १.९७ कोटी रुपये, लिंबारुई ते पाटेगाव रस्त्यावरील पुलाच्या बांधकामासाठी ९९ लक्ष रुपये, भाटसांगवी-बऱ्हाणपूर ते वाकनाथपूर रस्त्यावर व्हेंटेड कॉजवे बांधकाम करण्यासाठी २ कोटी रुपये यांसह मतदार संघातील विविध रस्त्यांच्या कामासाठी २५ कोटी रुपयांचा निधी मंजुर करण्यात आला आहे.
विधानसभा निवडणुकी दरम्यान मतदारांना दिलेल्या आश्वासनांची पुर्तता करण्यासाठी आपण कटिबध्द असल्याची प्रतिक्रिया देऊन गेवराई विधानसभा मतदार संघाचे आ. विजयसिंह पंडित यांनी निधीच्या उपलब्धते बाबत मुख्यमंत्री देवेंद्र फडणवीस, उपमुख्यमंत्री सुनेत्रावहिणी पवार, उपमुख्यमंत्री एकनाथराव शिंदे, संबंधित विभागांचे मंत्री आणि महायुती सरकारचे आभार व्यक्त केले आहे. या निधीतील मंजुर कामे अतिशय दर्जेदार करून घेण्यासाठी आपण प्रयत्नशील असल्याचेही त्यांनी यावेळी सांगितले. मतदार संघातील उर्वरित कामांनाही मंजुरीसह निधीच्या उपलब्धते बाबत आपण सातत्याने पाठपुरावा करत असल्याचे त्यांनी शेवटी सांगितले आहे.
