बीड — शेतातील बांधाच्या
वादावरून मारहाणीचा प्रकार घडला आहे. ‘तुझा संतोष देशमुख करतो’, अशी धमकी देत भररस्त्यात आरोपीने गाडीवरून जाणाऱ्या तरूणावर कोयत्याने सपासप वार केले. शरीरावर 10 हून अधिक गंभीर वार असल्याची माहिती आहे. तरूणाची स्थिती गंभीर असून, त्याच्यावर उपचार सुरू आहेत. सर्वात धक्कादायक बाब म्हणजे इतक्या गंभीर हल्ल्यानंतरही गुन्हा दाखल झाला नाही.
कैलास सांगुळे असं जखमी तरूणाचं नाव आहे. तो बीड तालुक्यातील तांदळवाडी भिल्ल येथील रहिवासी आहे. कैलास गाडी चालवत होता. यादरम्यान, चार जणांनी त्याची वाट अडवली. तसेच कोयत्याने डोक्यावर, मानेवर आणि तोंडावर जबरदस्त हल्ला केला. हल्लेखोरांनी ‘तुझा संतोष देशमुख करतो, याला जीवे मारा’
अशी धमकी देत त्याला मारहाण केली.यानंतर त्याच्या भावाने घटनास्थळी धाव घेत भावाला बीडमधील एका खासगी रुग्णालयात उपचारासाठी दाखल केलं. कैलासवर सध्या रूग्णालयात उपचार सुरू असून, त्याची प्रकृती गंभीर असल्याची माहिती आहे.यानंतर कुटुंबाने पोलिसांवर गंभीर आरोप करीत आक्रोश व्यक्त केला आहे. आरोपी अद्याप मोकाट असून याप्रकरणी बीड ग्रामीण पोलिसांनी गुन्हा दाखल करून घेण्यास टाळाटाळ केल्याचा आरोप केला आहे.माझ्या भावाचं काही बरं वाईट झालं तर याला जबाबदार पोलीस प्रशासन असेल अशी प्रतिक्रिया श्रीरंग सांगूळे यांनी देत प्रशासनाविरोधात तीव्र नाराजी व्यक्त केली.
