बीड — बीड जिल्ह्यात कायदा सुव्यवस्थेची लक्तर रोजच वेशीवर टांगली जातात.पण आज तर न्यायालय आवारात देखील वकिलाला मारहाण करून पोलिसांचा धाक नसल्याचं सप्रमाण सिद्ध झालं.जिल्हा न्यायालयात मंगळवारी 11 वा. मोठा राडा पाहायला मिळाला. टेबल समोर गाडी लावू नका असं म्हणताच राधाकिसन करपे याने एॅड. राम डोंगरे यांना शिवीगाळ केली. चार दोन महिलांना सोबत आणून मारहाण केल्याची खळबळ जनक घटना घडली. या प्रकारामुळे कायदा सुव्यवस्थेवर प्रश्नचिन्ह निर्माण झाले आहे.
जिल्ह्यात दररोज मारहाणी, खून, दरोडे चोऱ्या यासारख्या घटनांमध्ये प्रचंड वाढ झाली आहे. पोलिसांच्या आश्रयांनी सुरू असलेल्या अवैध धंद्यामुळे गुंड मस्तवाल झाले आहेत. परिणामी सर्वसामान्य जनतेत जीन हराम झालेलं असतानाच न्यायालयात देखील मारहाणीची घटना होणं खाकीच्या प्रामाणिकपणावर कर्तव्यदक्षतेवर प्रश्नचिन्ह निर्माण केलं जाऊ लागला आहे.सकाळी न्यायालयाचे कामकाज सुरू होताच वकिलांच्या टेबल समोर राधाकिसन करपे नावाच्या शाहूनगर भागातील इसमाने मोटार सायकल आणून उभा केली. यावेळी एॅड. राम डोंगरे यांनी गाडी थोडी बाजूला लावा जाण्या येण्यासाठी रस्ता ठेवा असं म्हणताच राधाकिसन करपे ने शिवीगळ करण्यास सुरुवात केली. त्यावेळी बाचाबाची होऊन प्रकरण मिटले देखील. त्यानंतर दुपारी बाराच्या सुमारास राधाकिसन करपे याने काही महिलांना सोबत घेऊन न्यायालय आवारात येत एड. राम डोंगरे यांना मारहाण करण्यास सुरुवात केली. यामध्ये एड. राम डोंगरे जखमी झाले आहेत. याप्रकरणी वकील संघ आक्रमक झाला असून शिवाजीनगर पोलीस ठाण्यात गुन्हा नोंद करण्यासाठी वकिलांनी धाव घेतली. दरम्यान एका महिलेने वकिला विरोधातच तक्रार दिली असल्याची माहिती पोलिसांकडून दिली गेली. तुम्ही तक्रार द्या असं शिवाजीनगर पोलीस ठाण्याचे पोलीस निरीक्षक प्रवीण बांगर यांनी वकिलांना सांगताच वकील संघाचे पदाधिकारी संतप्त झाले. आपला मोर्चा त्यांनी पोलीस अधीक्षक कार्यालयाकडे वळवला. एस पी ची भेट घेऊन प्रकरणाची शहानिशा करावी व संबंधितांवर गुन्हे दाखल करण्यात यावेत अशी मागणी वकील संघाने केली आहे. घडलेल्या या घटनेने जिल्ह्यात खळबळ माजली असून कायदा सुव्यवस्थेचा धाक राहिला नसल्याचं बोललं जात आहे. दरम्यान उद्या बुधवारी दिवसभर वकील संघ न्यायालयीन कामकाज बंद ठेवून निषेध नोंदवणार आहे.
