गेवराई — अवैध वाळू वाहतूक करणाऱा हायवा पोलिसांनी पकडला असून साडेअठरा लाख रुपयांचा रुपयांचा मुद्देमाल जप्त केला आहे.चालकाविरुद्ध गुन्हा दाखल करण्यात आला आहे. ही कारवाई बुधवारी पहाटे करण्यात आली.
पोलीस ठाणे गेवराई येथे कार्यरत असलेले पोलीस उपनिरीक्षक हिमांशु नागरे यांनी दिलेल्या फिर्यादीनुसार, गुप्त माहितीच्या आधारे पोलिस पथकाने बुधवारी पहाटे सुमारे पाच वाजण्याच्या सुमारास संभाजी चौकाजवळील राष्ट्रीय महामार्ग क्रमांक ५२ वरील झमझम पेट्रोल पंप परिसरात नाकाबंदी केली होती.यावेळी बीडकडे वाळू भरून जाणारा एक हायवा येताना दिसल्याने पोलिसांनी त्याला थांबवून चौकशी केली. चालकाने आपले नाव साहिल शांताराम कापसे वय २० वर्ष, रा. अचानक नगर, गेवराई असे सांगितले. चौकशीदरम्यान त्याच्याकडे वाळू वाहतुकीसाठी कोणताही वैध परवाना नसल्याचे आढळून आले.पोलिसांनी एमएच-१२-क्यूडब्ल्यू-४२२२ क्रमांकाचे हायवा वाहन (अंदाजे किंमत १८ लाख रुपये) तसेच सुमारे ३० हजार रुपये किमतीची पाच ब्रास वाळू असा एकूण १८ लाख ३० हजार रुपयांचा मुद्देमाल जप्त केला आहे. या प्रकरणी चालक साहिल कापसे याच्याविरुद्ध भारतीय न्याय संहिता कलम ३०३ (२) अंतर्गत गुन्हा दाखल करण्यात आला असून पुढील तपास गेवराई पोलीस करत आहेत.
