Physical Address
304 North Cardinal St.
Dorchester Center, MA 02124
केज (बीड) — गेवराई तालुक्यातील टाकळगव्हाण येथील एका सराफाला स्वस्तात दुबईहून आणलेले सोन्याचे बिस्किट देण्याचे आमिष दाखवून तब्बल 3 लाख रुपयांची लूट करण्यात आल्याची धक्कादायक घटना समोर आली आहे. मात्र, पैसे घेऊन पळून जात असताना आरोपींच्या दुचाकीचा अपघात झाल्याने पोलिसांनी दोन आरोपींना जेरबंद करण्यात यश मिळवले.
मिळालेल्या माहितीनुसार, सराफ दत्ता काकडे यांना धाराशिव जिल्ह्यातील एका भामट्याने सोशल मीडियावरून फ्रेंड रिक्वेस्ट पाठवून ओळख वाढवली होती. त्यानंतर “दुबईहून टॅक्स चुकवून आणलेली सोन्याची बिस्किटे स्वस्तात देतो” असे आमिष दाखवण्यात आले.
या व्यवहारावर विश्वास ठेवून रविवारी (17 मे) दुपारी दत्ता काकडे आणि त्यांचे कारागीर सतीश दीक्षित हे 3 लाख रुपये घेऊन त्यांच्या किया कारमधून केज येथील उमरी फाट्याजवळ पोहोचले. तेथे आरोपींनी त्यांना गंगा माऊली कारखान्याजवळील एका शाळेच्या भिंतीमागे नेले.
तिथे पोहोचताच आरोपींनी सतीश दीक्षित यांच्या हातातील पैशांची पिशवी हिसकावून घेतली. तसेच दत्ता काकडे यांच्या पाठीवर लोखंडी रॉडने हल्ला करून आरोपी दुचाकीवरून फरार झाले.
दरम्यान, स्थानिक नागरिकांनी आरोपींना पकडण्याचा प्रयत्न केला असता भरधाव वेगातील दुचाकीवरील नियंत्रण सुटले आणि समोरून येणाऱ्या कारवर दुचाकी जोरात आदळली. या अपघातात आरोपी आप्पा शिवाजी शिंदे आणि विशाल रामकिसन शिंदे (रा. मांडवा, ता. कळंब, जि. धाराशिव) हे गंभीर जखमी झाले.
घटनेची माहिती मिळताच केज पोलिसांनी घटनास्थळी धाव घेत दोन्ही आरोपींना ताब्यात घेतले. पोलिसांनी झडती घेतली असता आरोपींकडून धारदार चाकू आणि केबल वायरचा बंच जप्त करण्यात आला. जखमी आरोपींवर सध्या उपचार सुरू असून त्यांच्या इतर साथीदारांचा पोलीस शोध घेत आहेत.
या प्रकरणी सराफ दत्ता काकडे यांच्या फिर्यादीवरून केज पोलीस ठाण्यात गुन्हा दाखल करण्यात आला असून पोलीस निरीक्षक स्वप्नील उनवणे यांच्या मार्गदर्शनाखाली पुढील तपास सुरू आहे.
