विलास घुले हत्या प्रकरणात ओबीसी समाज आक्रमक; बीड जिल्हाधिकारी कार्यालयावर मोर्चा

बीड — केज तालुक्यातील टाकळी येथील स्व. विलास घुले हत्या प्रकरणातील आरोपींवर मकोका अंतर्गत कारवाई करावी, सर्व आरोपींना तातडीने अटक करावी, तसेच पुरवणी जबाबात नाव आल्याचा उल्लेख असलेल्या खासदार बजरंग सोनवणे यांच्या मुलाचीही चौकशी करून अटक करावी, या मागण्यांसाठी ओबीसी समाज बांधवांनी शुक्रवारी बीड जिल्हाधिकारी कार्यालयावर विराट मोर्चा काढला.

बीड शहरातील छत्रपती शिवाजी महाराज क्रीडांगणापासून मोर्चाला सुरुवात झाली. सुभाष रोड, लोकशाहीर अण्णाभाऊ साठे चौक, बसस्थानक, छत्रपती शिवाजी महाराज पुतळा (शिवतीर्थ) परिसर आणि नगर रोड मार्गे मोर्चा जिल्हाधिकारी कार्यालयावर धडकला. ‘न्याय द्या’च्या घोषणा देत आंदोलकांनी विविध मागण्यांचे फलक हातात घेतले होते.

या मोर्चात ज्येष्ठ विधिज्ञ अॅड. गुणरत्न सदावर्ते सहभागी झाले होते. त्यांनी आंदोलनस्थळी सुरू असलेल्या उपोषणाचीही भेट घेऊन घुले कुटुंबीयांशी संवाद साधला.

१७ दिवसांपासून घुले कुटुंबीयांचे उपोषण

विलास घुले यांच्या कुटुंबीयांकडून गेल्या १७ दिवसांपासून जिल्हाधिकारी कार्यालयासमोर उपोषण सुरू आहे. हत्या प्रकरणातील आरोपींना अटक करण्यासह कुटुंबीयांना शासनाने तातडीने आर्थिक मदत द्यावी, अशी त्यांची मागणी आहे. प्रशासनाने या उपोषणाची दखल घ्यावी, अशी मागणी मोर्चेकऱ्यांनी केली.

दुपारनंतर जिल्हाधिकारी कार्यालयासमोरील मोर्चाचे सभेत रूपांतर झाले. यावेळी विलास घुले हत्या प्रकरणात कठोर कारवाई करण्याची मागणी करण्यात आली.

मोर्चाच्या मार्गावर झळकले ‘ते’ बॅनर; बीडमध्ये चर्चेला उधाण

दरम्यान, मोर्चाच्या मार्गावर लागलेल्या एका बॅनरने या आंदोलनाला वेगळे वळण मिळाले. परळीतील महादेव मुंडे हत्या प्रकरणाच्या पार्श्वभूमीवर ‘गड्याहो, मी पण तुमचाच समाज बांधव ना? माझ्यासाठी रस्त्यावर कधी उतरणार?’ असा सवाल या बॅनरमधून करण्यात आला होता.

महादेव मुंडे हत्या प्रकरणाला दीड वर्षाहून अधिक काळ उलटूनही त्यांच्या कुटुंबीयांना न्यायासाठी संघर्ष करावा लागत असल्याचा मुद्दा या बॅनरमधून उपस्थित करण्यात आला. एकाच समाजातील दोन हत्या प्रकरणांमध्ये न्यायासाठी होणाऱ्या आंदोलनांमध्ये दुजाभाव का, असा सवाल त्यातून करण्यात आल्याची चर्चा शहरात रंगली.

मोर्चादरम्यान काही वेळातच हे बॅनर हटवण्यात आले. मात्र, त्याची चर्चा दिवसभर बीड जिल्ह्यात सुरू होती.

मकोका आणि तातडीच्या अटकेची मागणी

विलास घुले हत्या प्रकरणातील सर्व आरोपींवर कठोर कायदेशीर कारवाई करावी, मकोका लागू करावा आणि आरोपींना तातडीने अटक करावी, अशी ठाम मागणी मोर्चेकऱ्यांनी केली. तसेच घुले कुटुंबीयांना शासनाकडून आर्थिक मदत देऊन त्यांना न्याय मिळवून द्यावा, अशी मागणीही करण्यात आली.

दरम्यान, पुरवणी जबाबात खासदार बजरंग सोनवणे यांच्या मुलाचे नाव आल्याचा मोर्चेकऱ्यांचा दावा असून, त्याचीही चौकशी करून कायद्यानुसार कारवाई करावी, अशी मागणी आंदोलनातून करण्यात आली. या आरोपांबाबत संबंधित तपास यंत्रणेने अधिकृत भूमिका स्पष्ट करणे अपेक्षित आहे.

विलास घुले हत्या प्रकरणातील तपास, आरोपींवरील कारवाई आणि घुले कुटुंबीयांच्या मागण्यांकडे आता प्रशासन काय भूमिका घेते, याकडे बीड जिल्ह्याचे लक्ष