महाराष्ट्र विधानपरिषद निवडणूक 2026: 9 जागांसाठी 12 मे रोजी मतदान, राजकीय समीकरणे तापली

मुंबई — महाराष्ट्रातील राजकारणात पुन्हा एकदा हालचाल वाढली आहे. महाराष्ट्र विधानपरिषदेच्या 9 जागांसाठी निवडणूक कार्यक्रम अधिकृतपणे जाहीर करण्यात आला असून 12 मे 2026 रोजी मतदान होणार आहे. त्यामुळे राज्यातील सर्व प्रमुख पक्षांमध्ये उमेदवारीसाठी चुरस वाढली आहे.
निवडणूक आयोगाच्या घोषणेनुसार, विधानपरिषदेतील 9 आमदारांचा कार्यकाळ 13 मे 2026 रोजी संपणार आहे. यामुळे नव्या सदस्यांच्या निवडीसाठी राजकीय घडामोडींना वेग आला आहे.

 राजकीय गणित: कोणाला किती जागा?

विधानसभेतील सध्याच्या संख्याबळानुसार संभाव्य चित्र असे दिसत आहे:
भाजप – 5 जागा
शिवसेना (शिंदे गट) – 2 जागा
राष्ट्रवादी काँग्रेस (अजित पवार गट) – 1 जागा
महाविकास आघाडी – 1 जागा
मात्र, राष्ट्रवादी काँग्रेस (अजित पवार गट) कडे अतिरिक्त मते असल्यामुळे महायुतीकडून एक जास्तीचा उमेदवार दिला जाऊ शकतो. असे झाल्यास निवडणूक बिनविरोध होण्याची शक्यता कमी होऊ शकते.

उमेदवारीसाठी चढाओढ वाढली

भाजपमध्ये इच्छुकांची संख्या मोठी असल्याने पक्षात अंतर्गत स्पर्धा वाढली आहे.
विशेषतः राज्यसभेत संधी न मिळालेल्या नेत्यांना विधानपरिषदेची संधी मिळू शकते, अशी चर्चा आहे.

कोणत्या आमदारांचा कार्यकाळ संपणार?

या निवडणुकीत खालील आमदारांचा कार्यकाळ संपत आहे:
उद्धव ठाकरे – शिवसेना (उबाठा)
नीलम गोऱ्हे – शिवसेना (शिंदे गट)
शशिकांत शिंदे – राष्ट्रवादी काँग्रेस (शरद पवार गट)
अमोल मिटकरी – राष्ट्रवादी काँग्रेस (अजित पवार गट)
गोपीचंद पडळकर – भाजप
रणजितसिंह मोहिते-पाटील – भाजप
राजेश राठोड – काँग्रेस
प्रवीण दटके – भाजप
रमेश कराड – भाजप