परळीतील हॉटेल चालकाची पैशांच्या वादातून निर्घृण हत्या; एक आरोपी ताब्यात

परळी — शहरात पैशांच्या किरकोळ वादातून एका हॉटेल चालकाची चाकूने गळा चिरून निर्घृण हत्या करण्यात आल्याची धक्कादायक घटना उघडकीस आली आहे. या घटनेमुळे शहरात मोठी खळबळ उडाली असून पोलिसांनी एका आरोपीला ताब्यात घेतले आहे, तर दुसरा आरोपी अद्याप फरार आहे.

मृत व्यक्तीचे नाव कारभारी नारायण आंधळे असे असून ते परळी येथे ‘पवन हॉटेल’ चालवून आपल्या कुटुंबाचा उदरनिर्वाह करत होते. गुरुवारी (दि. 21 मे) रात्री हॉटेल बंद झाल्यानंतर कारभारी आंधळे हे संशयित आरोपी सचिन सोमनाथ राठोड आणि सुमीत पवार यांच्यासोबत बसून दारू पीत होते. यावेळी पैशांच्या देवाणघेवाणीवरून त्यांच्यात वाद झाला.

वाद वाढत जाऊन त्याचे रूपांतर हाणामारीत झाले. पोलिसांच्या माहितीनुसार, सचिन राठोड याने कारभारी आंधळे यांना पकडून ठेवले, तर सुमीत पवार याने धारदार चाकूने त्यांच्या मानेवर आणि हातावर सपासप वार केले. गंभीर जखमी झालेल्या कारभारी आंधळे यांचा घटनास्थळीच मोठ्या प्रमाणात रक्तस्त्राव झाला.

घटनेनंतर आरोपी सचिन राठोड यानेच कारभारी आंधळे यांच्या मुलाला फोन करून वडील जखमी अवस्थेत पडल्याची माहिती दिली. माहिती मिळताच मृताचे मोठे चिरंजीव ओमकेश आंधळे व नातेवाईक अरुणोदय मार्केट लाईन परिसरात पोहोचले. त्यानंतर जखमी अवस्थेतील कारभारी आंधळे यांना अंबाजोगाई येथील शासकीय रुग्णालयात दाखल करण्यात आले. मात्र, डॉक्टरांनी त्यांना मृत घोषित केले.

या प्रकरणी ओमकेश आंधळे यांच्या फिर्यादीवरून परळी शहर पोलीस ठाण्यात सचिन राठोड आणि सुमीत पवार यांच्याविरुद्ध खुनाचा गुन्हा दाखल करण्यात आला आहे. पोलिसांनी सचिन राठोड याला ताब्यात घेतले असून फरार आरोपी सुमीत पवारचा शोध सुरू आहे. पोलीस उपनिरीक्षक नितीन गट्टूवार या प्रकरणाचा पुढील तपास करत आहेत.