जुगार अड्ड्याला विरोध करणाऱ्या महिलेला अमानुष मारहाण; रंजेगावातील घटनेने खळबळ

बीड — बीड जिल्ह्यातील पिंपळनेर परिसरातील रंजेगाव येथे जुगार अड्ड्याला विरोध करणाऱ्या एका महिलेला अमानुष मारहाण करण्यात आल्याची धक्कादायक घटना समोर आली आहे. या घटनेमुळे परिसरात भीतीचे वातावरण निर्माण झाले असून कायदा-सुव्यवस्थेबाबत गंभीर प्रश्न उपस्थित होत आहेत.

मिळालेल्या माहितीनुसार, गावातील एका कथित जुगार अड्ड्यामुळे शाळकरी मुलांवर विपरीत परिणाम होत असल्याचे सांगत संबंधित महिलेने त्याला विरोध केला होता. याच कारणावरून काही जणांनी तिच्यावर हल्ला केल्याचा आरोप करण्यात आला आहे.

पीडित महिलेच्या आरोपानुसार, आरोपींनी प्रथम तिच्या घरावर दगडफेक करून दहशत निर्माण करण्याचा प्रयत्न केला. त्यानंतर निखिल आबूज आणि त्याच्या चार ते पाच साथीदारांनी महिलेला बेदम मारहाण केली. हल्ल्यात महिलेला गंभीर दुखापत झाली असून तिच्यावर सध्या बीड जिल्हा शासकीय रुग्णालयात उपचार सुरू आहेत.
हल्ल्यादरम्यान महिलेच्या दोन लहान मुलांनाही आरोपींनी धक्काबुक्की करत फेकल्याचा आरोप करण्यात आला आहे. या घटनेत मुलांना किरकोळ दुखापत झाल्याचे सांगण्यात येत आहे.
या प्रकरणात आरोपींचे  वाल्मीक कराड सोबत संबंध असल्याचं सांगितलं जात आहे. आरोपी आणि वाल्मीक कराड यांचे फोटोही समोर आले आहेत. मात्र, याबाबत अधिकृत यंत्रणेकडून कोणतीही पुष्टी करण्यात आलेली नाही.
दरम्यान, पीडित महिलेच्या तक्रारीनंतर संबंधित पोलीस ठाण्यात गुन्हा दाखल करण्यात आला आहे. मात्र, वृत्त लिहिपर्यंत आरोपींना अटक झालेली नसल्याची माहिती समोर आली आहे. त्यामुळे नागरिकांमध्ये संतापाचे वातावरण असून आरोपींना तातडीने अटक करण्याची मागणी होत आहे.
पोलीस या प्रकरणाचा अधिक तपास करत आहेत.