बीड — देशभरात गाजलेल्या NEET पेपरफुटी प्रकरणातील प्रमुख सूत्रधार म्हणून नाव समोर आलेले प्राध्यापक पी. व्ही. कुलकर्णीच्या बीड शहरातील अनधिकृत बांधकामावर अखेर बुलडोझर चालविण्यात आला आहे.
नगरपालिकेकडून वारंवार नोटीस बजावण्यात आल्यानंतर ही कारवाई करण्यात आली. या प्रकरणांने जिल्हाभरात जोरदार चर्चा सुरू आहे.
नीट (NEET )पेपरफुटी प्रकरणाचा तपास सुरू असताना पी. व्ही. कुलकर्णी ची बीडमधील मोठी मालमत्ता चर्चेत आली होती. शाहूनगर परिसरात उभारण्यात येत असलेल्या त्यांच्या व्यावसायिक कॉम्प्लेक्सची नगरपालिका प्रशासनाने पाहणी केली होती. तपासणीदरम्यान बांधकामासाठी आवश्यक परवानग्या नसल्याचे तसेच अनेक नियमांचे उल्लंघन झाल्याचे आढळून आले.
याप्रकरणी नगरपालिका प्रशासनाने संबंधितांना नोटीस देत बांधकाम स्वतःहून हटविण्याचे निर्देश दिले होते. अन्यथा पालिकेकडून थेट तोडक कारवाई करण्यात येईल, असा इशाराही देण्यात आला होता. मुदत संपल्यानंतर आता नगरपालिकेकडून बुलडोझर आणि अन्य यंत्रसामग्रीच्या सहाय्याने बांधकाम पाडण्याचे काम सुरू करण्यात आले आहे.
दरम्यान, लातूरमधील RCC क्लासेसचे प्रा. शिवराज मोटेगावकर आणि प्रा. पी. व्ही. कुलकर्णी यांना न्यायालयाने 10 जूनपर्यंत न्यायालयीन कोठडी सुनावली आहे. तपासादरम्यान काही धक्कादायक माहितीही समोर आली आहे. लातूरमधील बालरोगतज्ज्ञ डॉ. मनोज शिरुरे यांच्या फ्लॅटवर विद्यार्थ्यांसाठी विशेष वर्ग घेतले जात असल्याचे तपास यंत्रणांना आढळल्याची माहिती समोर आली आहे.
NEET पेपरफुटी प्रकरणामुळे आधीच चर्चेत असलेल्या पी. व्ही. कुलकर्णी च्या मालमत्तेवर सुरू झालेल्या या कारवाईमुळे बीड जिल्ह्यात राजकीय आणि सामाजिक स्तरावर विविध चर्चांना उधाण आले आहे. अनधिकृत बांधकामांविरोधात प्रशासन कठोर भूमिका घेत असल्याचा संदेश या कारवाईतून दिला जात असल्याचे मानले जात आहे.
