पुणे — नसरापूर येथील अल्पवयीन बालिकेवरील लैंगिक अत्याचार आणि खून प्रकरणात मोठी न्यायालयीन घडामोड झाली असून आरोपी भीमराव कांबळे याच्याविरोधात विशेष न्यायालयाने आरोप निश्चित केले आहेत. गुरुवारी झालेल्या सुनावणीत न्यायालयाने आरोपीविरुद्धच्या गंभीर आरोपांची दखल घेत पुढील खटला नियमितपणे चालवण्याचे निर्देश दिले.
या प्रकरणात पोलिसांनी अवघ्या 15 दिवसांत दोषारोपपत्र (चार्जशीट) दाखल केले होते. त्यानंतर अवघ्या 28 दिवसांच्या कालावधीत आवश्यक न्यायालयीन प्रक्रिया पूर्ण करण्यात आली. त्यामुळे या संवेदनशील प्रकरणातील सुनावणी आता वेगाने पुढे जाणार आहे.
फास्ट ट्रॅक न्यायालयात आरोपी भीमराव कांबळे याला प्रथमच हजर करण्यात आले.
सुनावणीदरम्यान शवविच्छेदन अहवाल (PM Report), वैद्यकीय तपासण्या आणि इतर महत्त्वाचे पुरावे न्यायालयासमोर सादर करण्यात आले. दोन्ही बाजूंकडून जोरदार युक्तिवाद करण्यात आला. मात्र बचाव पक्षाकडून आरोप खोडून काढणारे कोणतेही ठोस पुरावे सादर करण्यात आले नाहीत. त्यानंतर न्यायालयाने आरोपीविरोधात आरोप निश्चित केले.
या महत्त्वाच्या सुनावणीवेळी विशेष सरकारी वकील अॅड. अजय मिसर, मूळ तक्रारदार पक्षाचे वकील, पुणे ग्रामीणचे पोलीस अधीक्षक संदीपसिंह गिल तसेच तपास अधिकारी न्यायालयात उपस्थित होते.
न्यायालयाने या प्रकरणाची रोज सुनावणी घेण्याचा निर्णय घेतला असून संपूर्ण कार्यवाही ‘इन-कॅमेरा’ पद्धतीने होणार आहे. त्यामुळे पीडितेची ओळख आणि गोपनीयता कायम राखली जाणार आहे.
दरम्यान, आरोपी भीमराव कांबळे याच्यावर भारतीय न्याय संहिता (BNS) 2023 अंतर्गत कलम 103(1), 64, 65(2), 74, 137(2), 140(1) तसेच पोक्सो कायदा 2012 अंतर्गत कलम 4, 6, 8 आणि 12 अन्वये गंभीर गुन्हे दाखल करण्यात आले आहेत. न्यायालयाने आता या सर्व आरोपांना मान्यता देत खटल्याच्या पुढील सुनावणीचा मार्ग मोकळा केला आहे.
या प्रकरणातील जलद तपास, वेगवान चार्जशीट आणि न्यायालयीन प्रक्रियेमुळे पीडित कुटुंबाला लवकर न्याय मिळण्याची अपेक्षा व्यक्त केली जात आहे.
