मस्साजोग पोटनिवडणूक : संतोष देशमुख यांच्या पत्नी अश्विनी देशमुख पराभूत, गावकऱ्यांचा विकासाला कौल

बीड — मस्साजोग ग्रामपंचायत पोटनिवडणुकीचा निकाल धक्कादायक लागला असून मयत संतोष देशमुख यांच्या पत्नी अश्विनी देशमुख यांचा स्वरूपानंद देशमुख यांनी 92 मतांनी पराभव केला आहे.

जिल्ह्यातील मस्साजोग ग्रामपंचायतीच्या सरपंचपदाच्या पोटनिवडणुकीत अत्यंत लक्षवेधी आणि धक्कादायक निकाल समोर आला आहे. या निवडणुकीत स्वरूपानंद देशमुख यांनी मयत सरपंच संतोष देशमुख यांच्या पत्नी आश्विनी देशमुख यांचा पराभव करत मतांच्या मोठ्या फरकाने विजय मिळवला आहे.

या निवडणुकीकडे बीड सह संपूर्ण राज्याचे लक्ष लागले होते. संतोष देशमुख यांच्या हत्येमुळे रिक्त झालेल्या सरपंचपदासाठी ही पोटनिवडणूक घेण्यात आली होती. संतोष देशमुख यांच्या कुटुंबीयांकडून ही निवडणूक बिनविरोध व्हावी, असा प्रयत्न करण्यात आला होता. मात्र गावकऱ्यांना विश्वासात न घेतल्याचा आरोप करत स्वरूपानंद देशमुख यांनी निवडणूक रिंगणात उडी घेतली.
प्रचारादरम्यान दोन वेगवेगळे मुद्दे समोर आले.
आश्विनी देशमुख यांनी भावनिक मुद्द्यावर, संतोष देशमुख यांचे विकासाचे राहिलेले स्वप्न पूर्ण करण्यासाठी त्यांच्या नावावर मते मागितली तर स्वरूपानंद देशमुख यांनी गावाच्या विकासाचा मुद्दा पुढे केला अखेर गावकऱ्यांनी विकासाच्या मुद्द्याला प्राधान्य देत स्वरूपानंद देशमुख यांच्या बाजूने कौल दिला. ते तब्बल ९२ मतांनी विजयी झाले.
विशेष म्हणजे, मागील निवडणुकीत स्वरूपानंद देशमुख यांचा संतोष देशमुख यांनी केवळ ९ मतांनी पराभव केला होता. मात्र यावेळी त्यांनी मोठ्या फरकाने विजय मिळवत राजकीय समीकरणे बदलली आहेत.