रूपाली चाकणकरचा महिला प्रदेशाध्यक्ष पदाचा राजीनामा

मुंबई — भोंदू अशोक खरात प्रकरणी रोज नव नवीन खुलासे होत आहेत. खरातसोबतचे व्हिडीओ फोटो व्हायरल झाल्यानंतर रुपाली चाकणकरला राज्य महिला आयोगाच्या अध्यक्षपदाचा राजीनामा द्यावा लागला आता राष्ट्रवादी महिला प्रदेशाध्यक्षपदाचा देखील राजीनामा दिला आहे. तिने उपमुख्यमंत्री सुनेत्रा पवारांकडे आपल्या पदाचा राजीनामा सुपूर्द केला आहे.

गेल्या काही दिवसांपासून रुपाली चाकणकरला प्रदेशाध्यक्षपदावरून हटवण्याची मागणी होत होती. अखेरीस रुपाली चाकणकरने आता राष्ट्रवादीला रामराम ठोकला आहे.
“खरात प्रकरणाबाबत पहिल्या दिवशीच मी माझी भूमिका स्पष्ट केली आहे. त्याच्या आर्थिक व्यवहारात, त्याच्या गैरकृत्यात दुरान्वये संबंध नाही, आजही तीच स्पष्ट आणि ठाम भूमिका आहे. तपासादरम्यान या सर्व बाबी निष्पन्न होतीलच. खोटे,असत्य आणि कुठलाही पुरावा नसताना जे आरोप माध्यमांमधून होत आहेत. ते वेदनादायक आहे. सत्य प्रखरतेने सिद्ध होईलच. हा तपास पारदर्शकपणे आणि निष्पक्षपणे व्हावा, ही माझी मागणी मी यापूर्वीच मुख्यमंत्री देवेंद्र फडणवीस, उपमुख्यमंत्री सुनेत्रा पवार,पोलीस महासंचालक यांच्याकडे केली आहे. आज सकाळी फोनद्वारे आदरणीय सुनेत्रा पवार यांच्याशी झालेल्या चर्चेनुसार मी माझ्या राष्ट्रवादी महिला काँग्रेस प्रदेशाध्यक्षपदाचा राजीनामा देत आहे” अशी माहिती रुपाली चाकणकरने ट्वीट करून दिली आहे.