सतीश उर्फ खोक्या भोसलेच्या कुटुंबावर प्राणघातक हल्ला

शिरूर (का) — तालुक्यातील तहसील समोर गायरान परिसरात सतीश उर्फ खोक्या भोसलेच्या कुटुंबीयांवर प्राणघातक हल्ल्याची घटना घडली. मध्यरात्री साडेअकरा वाजता दहा ते पंधरा जणांच्या टोळक्यांनी पारधी वस्तीवर हल्ला केला.या हल्ल्यात चार महिला गंभीररीत्या जखमी झाल्याचे सांगण्यात येत आहे, त्यापैकी एका महिलेची प्रकृती ही चिंताजनक असल्याची माहिती मिळत आहे.
या प्रकरणात मध्यरात्री साडेअकरा वाजता एक दोन नाही तर तब्बल 10 ते 15 जणांच्या टोळक्याने अचानकपणे हल्ला केला. टोळक्याच्या हातात लाकडी दांडके, कोयते, कुऱ्हाडीसारखी धारदार शस्त्रांचा वापर करत कुटुंबातील महिलांवर अमानुषपणे धारदार शस्त्राने हल्ला चढवला.या प्रकरणात महिलांनी जीव वाचवण्यासाठी आरडाओरड करण्यास सुरुवात केली. पण टोळक्याने कसलाही विचार न करता डोक्यावर तसेच पाठीत आणि पायावर सपासप वार करण्यात आले होते. या हल्ल्यात महिला रक्तबंबाळ झाल्या होत्या. जखमी महिलांनी कशीबशी शिरुर पोलीस ठाण्याची वाट धरली आणि तक्रार दाखल केली. तेव्हा पोलिसांनी परिस्थिती पाहता तातडीने कारवाई करत जखमी महिलांना बीडच्या शासकीय जिल्हा रुग्णालयात उपचारासाठी दाखल केलं आणि त्यांच्यावर सध्या उपचार सुरु आहेत.टोळक्यांनी सतीश भोसलेच्या आईला इथं का राहता? असा प्रश्न करत कुटुंबाला मारहाण केली. यामूळे घटनास्थळी भीतीचं वातावरण निर्माण झालं आहे. शिरुर पोलीस या संपूर्ण प्रकरणाचा तपास करण्यात येत आहे. संबंधित प्रकरणात आरोपीचा शोध सूरू आहे.