बिबट्याची दहशत संपेना बीड अहिल्यानगर महामार्गावर पुन्हा दिसला

सांगवी पाटण गावातही बिबट्या दिसला

आष्टी — ग्रामीण भागात बिबट्याचा वावर वाढल्याने लोकांमध्ये दहशतीचे वातावरण तयार झालेले आहे. यातच बीड अहिल्यानगर महामार्गावर म्हसोबावाडी ते घाटपिंपरी घाटात दुसऱ्यांदा बिबट्याचं 19 नोव्हेंबर रोजी पुन्हा दर्शन झालं. याबरोबरच सांगवी पाटण गावातील सुदर्शन विद्यालयाच्या गेट समोरच बिबट्या दिसल्याने वनविभागाने बिबट्याचा बंदोबस्त ताबडतोब करावा अशी मागणी केली जात आहे.
सांगवी पाटण गावातील सुदर्शन विद्यालयासमोर बिबट्या वावरताना दिसला. त्यामुळे खिळद, डोईठाण, कोहिनी, किनी, बेलगाव, बावी, दरेवाडी,कारखेल, धामणगाव परिसरातील नागरिकांनी सतर्कता बाळगांवी रात्रीच्या वेळी शक्यतो घराच्या बाहेर पडू नये, दोन-तीन जनाची सोबत असेल तरच फिरावे, सोबत टॉर्च काठी यासारख्या सुरक्षा साधनांचा वापर करून बिबट्या दिसल्यास वनविभागाला कळवण्यात यावे असे आवाहन केले आहे.

पाटण सांगवीत बिबट्या दिसलेला असतानाच बीड अहिल्यानगर महामार्गावर देखील 15 नोव्हेंबर रोजी बिबट्या दिसल्याचा व्हिडिओ व्हायरल झाला होता. त्यानंतर पुन्हा 19 नोव्हेंबर रोजी म्हसोबावाडी ते घाट पिंपरी घाटामध्ये रात्रीच्या दरम्यान पुन्हा बिबट्या दिसला. याचा देखील व्हिडिओ प्रवाशांनी चित्रित करून समाज माध्यमावर व्हायरल केला आहे. आष्टी वनपरिक्षेत्र हद्दीत गेल्या काही वर्षांपासून बिबट्यांची संख्खा वाढल्याचे दिसून येत आहे. शेतातसह, लोकवस्ती व आता रस्त्यावर त्याचा बिनधास्त संचार सुरू आहे. बिबटे निशाचर प्राणी आहेत, त्यामुळे त्यांची बहुतेक क्रियाकलाप आणि शिकार रात्रीच्या वेळीच होते. दिवसा ते विश्रांती घेतात. डोंगरपट्यात दडण असल्याने व रस्त्यावर आणि लोकवस्तीकडे बिबटे वळलेले असल्यामुळे यांचा तात्काळ बंदोबस्त करण्यात यावा अशी मागणी जनतेमधून होत आहे.