परळीत २६ किलो गांजासह पावणेआठ लाखांचा मुद्देमाल जप्त, आरोपी अटकेत ;एलसीबी ची कारवाई

बीड —  स्थानिक गुन्हे शाखेने परळीमध्ये अंमली पदार्थांच्या विरोधात एक मोठी आणि धडक कारवाई केली आहे. परळी येथील रामनगर भागात एका घरावर छापा टाकून पोलिसांनी तब्बल २६ किलो २५८ ग्रॅम गांजा जप्त केला आहे. या कारवाईत एकूण ७ लाख ८७ हजार ७४० रुपयांचा मुद्देमाल जप्त करण्यात आला असून, एका आरोपीला अटक करण्यात आली आहे.

मंगळवारी (दि. २ जून) दुपारी ४:३० वाजेच्या सुमारास स्थानिक गुन्हे शाखेच्या पथकाने परळीतील रामनगर भागात राहणारा संशयित राहुल राजू मोहिते (वय २६ वर्षे) याच्या घरावर अचानक छापा टाकला. या छाप्यात पोलिसांना घरात लपवून ठेवलेला २६ किलो २५८ ग्रॅम गांजा आढळून आला. पोलिसांनी गांजासह एकूण ७ लाख ८७ हजार ७४० रुपयांचा मुद्देमाल जप्त केला आहे. याप्रकरणी आरोपी राहुल मोहिते याच्याविरुद्ध परळी पोलीस ठाण्यात गुन्हा गुन्हा दाखल करण्यात आला आहे.

ही कारवाई बीड एलसीबीचे पोलीस निरीक्षक शिवाजी बंटेवाड यांच्या नेतृत्वाखालील पोलिस निरीक्षक रघुनाथ नाचन, उपनिरीक्षक दीपक राठोड, सफौ बालाजी दराडे, अंमलदार रामचंद्र केकान, गोविंद भताने, सचिन आंधळे, प्रल्हाद भताने, पुरुषोत्तम काळे, शीतल घुगे, पंडित पांचाळ, कैलास कोलमवाड, शुभम घुले आणि महिला पोलीस अंमलदार भोसले आदींनी केली.