नेकनूर:बस प्रवासात सराफा व्यापाऱ्याची अडीच किलो सोने असलेली बॅग लंपास

बीड — नांदेड मुंबई गाडीतून प्रवास करणाऱ्या व्यापाऱ्याची दोन कोटी रुपयाचं सोन्याचे दागिने असलेली बॅग लंपास केल्याची घटना नेकनूर पोलीस ठाणे हद्दीत घडली आहे.

नांदेडहून मुंबईकडे जात असलेल्या बस मध्ये मुंबईचा सराफ व्यापारी प्रवास करत होता.दरम्यान बस नेकनूर मांजरसुंबा महामार्गावर असलेल्या एका धाब्यावर जेवणासाठी थांबली. याच बसमध्ये मुंबईचे सराफा व्यापारी रमेश जैन देखील होते. त्यांच्यावर पाळत ठेवून असलेल्या अज्ञात इसमाने बस थांबलेली असताना त्यांची बॅग लंपास केली. ही बाब लक्षात आल्याबरोबर जैन यांनी नेकनूर पोलिसांशी संपर्क साधला त्या बॅगमध्ये अडीच किलो पेक्षा अधिकचे सोने असल्याचा दावा संबंधित व्यक्तीने केला आहे. पोलिसांनी धाब्यावरील सीसीटीव्ही फुटेज तपासले असता एका अज्ञात व्यक्तीने बॅग पसार केली असल्याचं स्पष्ट झाले आहे. नेकनूर पोलीस या चोरीचा तपास करत आहेत.