धर्मापुरी मतदान केंद्रावर राडा; मतदान केंद्रावरील सीसीटीव्ही कॅमेरे बंद

परळी — मतदार संघातील धर्मापुरी येथे मतदान केंद्रातील सीसीटीव्ही कॅमेरे बंद असल्याचा प्रकार राष्ट्रवादी काँग्रेस शरद पवार गटाचे उमेदवार राजेसाहेब देशमुख यांनी उघडकीस आणला.

लोकसभा निवडणुकीत देखील परळी तालुक्यात बोगस मतदान झाल्याच्या तक्रारी करण्यात आल्या होत्या. हीच बाब लक्षात घेऊन निवडणूक आयोगाने यावेळी असे प्रकार घडू नयेत यासाठी काळजी घेतली आहे. मात्र धर्मापुरी येथील मतदान केंद्रावर सीसीटीव्ही कॅमेरे बंद ठेवून त्याचे कनेक्शन कट करण्यात आले. ही बाब महाविकास आघाडीचे उमेदवार राजेसाहेब देशमुख यांनी उघडकीस आणला. त्यानंतर राजेसाहेब देशमुख त्यांचे समर्थक व धर्मापुरीतील विरोधी कार्यकर्त्यांमध्ये बाचाबाची झाली. यावेळी राजसाहेब देशमुख यांनी मतदान प्रक्रिया बंद ठेवण्यास सांगितले. मात्र पोलिसांनी वेळीच हस्तक्षेप करून सीसीटीव्ही कॅमेरे पुन्हा पूर्ववत सुरू केल्याची माहिती मिळत आहे. हा प्रकार उघडकीस आल्यानंतर मात्र जिल्ह्यात खळबळ माजली आहे