मुंबई — मराठा आरक्षणासाठी सातत्याने आंदोलन करणारे मनोज जरांगे पाटील यांनी नुकतेच केलेल्या उपोषणानंतर राज्य सरकारने त्यांच्या अनेक मागण्या मान्य केल्या आहेत. मात्र, ओबीसी प्रमाणपत्रधारकांना जात पडताळणी प्रमाणपत्र देण्याच्या मागणीवरून आता नव्या वादाला तोंड फुटले आहे. या मुद्द्यावर ओबीसी नेत्यांनी आक्रमक भूमिका घेत राज्यव्यापी आंदोलनाचा इशारा दिला आहे.
ओबीसी नेते प्रकाश शेंडगे यांनी पत्रकार परिषदेत बोलताना 12 जून रोजी राज्यव्यापी आंदोलन छेडण्याची घोषणा केली. जात पडताळणी प्रमाणपत्रांच्या प्रक्रियेत कथित बोगस दाखल्यांना मान्यता देण्यासाठी दबाव टाकला जात असल्याचा आरोप त्यांनी केला.
शेंडगे म्हणाले की, मनोज जरांगे यांच्या आंदोलनानंतर सरकार त्यांच्या सर्व मागण्या मान्य करत आहे. मात्र, या प्रक्रियेत ओबीसी समाजाच्या अधिकारांवर गदा येत असल्याची भावना समाजामध्ये निर्माण झाली आहे. त्यांनी मंत्री चंद्रशेखर बावनकुळे यांच्यावरही टीका करत, काही निर्णयांमुळे ओबीसी समाजात नाराजी असल्याचे सांगितले.
यावेळी त्यांनी मुख्यमंत्री देवेंद्र फडणवीस यांच्याकडे वेळ मागितली असून, ओबीसी समाजाची भूमिका ऐकून घेण्याची मागणी केली आहे. तसेच, कुणबी नोंदींच्या आधारे मिळालेल्या प्रमाणपत्रांचा वापर करून स्थानिक स्वराज्य संस्थांच्या निवडणुका लढवलेल्या व्यक्तींच्या प्रकरणांचा न्यायालयीन मार्गाने पाठपुरावा करण्याचा इशाराही दिला.
मराठा आरक्षण, कुणबी नोंदी आणि जात पडताळणी प्रमाणपत्र या मुद्द्यांवरून राज्यातील सामाजिक व राजकीय वातावरण पुन्हा तापण्याची चिन्हे दिसत आहेत. आगामी काळात सरकारची भूमिका आणि विविध समाजघटकांच्या प्रतिक्रिया याकडे राज्याचे लक्ष लागले आहे.
