नेकनूर — आहिल्यानगर येथून मार्केटींग करण्यासाठी आलेल्या सुनिल कुलकर्णी यांची ५ लाख ५३ हजार ९०० रूपये असलेली बॅग त्यांच्याच कार चालकाने लंपास केल्याचा प्रकार रविवार (दि.२२) रोजी नेकनूर येथे घडला. या प्रकरणी कुलकर्णी यांच्या फिर्यादीवरून त्यांच्या गाडीचा चालक अमोल चंद्रकांत बरफे याच्याविरूध्द गुन्हा दाखल करण्यात आला आहे.
अहिल्यानगर येथील सुनिल भास्कर कुलकर्णी (वय ५९) या मार्केटींग व्यवसायिकाने नेकनूर पोलीस ठाण्यात दिलेल्या फिर्यादीत म्हटले आहे की, मार्केटींगचे कामकाज करत असतांना माझ्या गाडीचा चालक अमोल चंद्रकांत बरफे रा. मिरी अडगाव ता. पाथर्डी जि. अहिल्यानगर याने गाडीतील मार्केटींगचे जमा केलेले ५ लाख ५३ हजार ९०० रूपये चोरून नेले. सदरील रक्कम एका बॅगमध्ये ठेवण्यात आली होती. ती बॅग गाडीमध्येच ठेऊन कुलकर्णी हे नेकनूर येथील अमोल मशिनरी या दुकानात गेले असता त्यांच्या गाडीच्या चालकाने ते येईपर्यंत पैशांची बॅग लंपास केल्याचे फिर्यादीत म्हटले आहे. या प्रकरणी अशोक बरफे याच्याविरूध्द नेकनूर पोलीस ठाण्यात गुन्हा दाखल झाला असुन पुढील तपास पोउपनि धायगुडे करीत आहेत.
