बीड — ‘लाडकी बहिण’ योजनेच्या नावाखाली समाज कल्याण विभागातील कर्मचारी असल्याचे भासवून महिलांना पिठाची गिरणी, शिलाई मशीन व भांड्यांचे किट देण्याचे आमिष दाखवत ऑनलाईन पैसे उकळणाऱ्या आरोपीला अंमळनेर पोलिसांनी जालन्यातून अटक केली आहे.
गोरक्षनाथ नवनाथ पन्हाळकर रा. नाळवंडी, ता. पाटोदा, ह.मु. तळेगाव, जि. बीड असे अटक करण्यात आलेल्या आरोपीचे नाव आहे. मिळालेल्या माहितीनुसार, आरोपीने महिलांना फोन करून आपण समाजकल्याण विभागातून बोलत असल्याचे सांगितले. “तुमची शासनाच्या ‘लाडक्या बहिणी’ योजनेत विशेष निवड झाली असून तुम्हाला पिठाची गिरणी, शिलाई मशीन व भांड्यांचे किट देण्यात येणार आहे,” असे सांगून विश्वास संपादन केला. मात्र या वस्तू पाठविण्यासाठी वाहतूक खर्च म्हणून आधी ऑनलाईन पैसे पाठवावे लागतील, असे सांगत फोन-पेवर रक्कम पाठवण्यास सांगितले.या आमिषाला बळी पडत पाटोदा तालुक्यातील पिंपळवंडी येथील पाच महिलांनी मिळून सुमारे ९ हजार रुपये आरोपीला पाठवले. मात्र पैसे पाठवूनही कोणतीही वस्तू न मिळाल्याने आपली फसवणूक झाल्याचे लक्षात आल्यानंतर संबंधित महिलेने १५ फेब्रुवारी २०२६ रोजी अंमळनेर पोलीस ठाण्यात अज्ञात व्यक्तीविरुद्ध तक्रार दाखल करण्यात आला. तपासादरम्यान सुमारे २५ ते ३० मोबाईल क्रमांकांचे सीडीआर काढून हजारो मोबाईल क्रमांकांची पडताळणी करण्यात आली. आरोपी वारंवार सिम कार्ड बदलत तसेच मोबाईल सुरू-बंद करत असल्याने तपासात अडचणी येत होत्या. मात्र तांत्रिक मदतीच्या साहाय्याने आणि बारकाईने तपास करत पोलिसांनी आरोपीचा माग काढला. अखेर ९ मार्च २०२६ रोजी जालना येथील रेल्वे स्थानक परिसरातून आरोपीला ताब्यात घेऊन अटक करण्यात आली.
ही कारवाई सहाय्यक पोलीस निरीक्षक भार्गव सपकाळ, पोलीस कॉन्स्टेबल योगेश बहिरवाळ, दिलीप घोशीर, पूजा तिपटे व शितल पवळ यांनी केली. पुढील तपास उपनिरीक्षक कृष्णा चव्हाण यांच्या मार्गदर्शनाखाली पोलीस हवालदार बबन शिंदे, विलास माळी, भरत राठोड, शाम खाडे, संतोष कसाब, गणेश गोसावी, मारुती म्हेत्रे, शत्रुघ्न दिंडे व चालक ईसूफ शेख हे करीत आहेत.
