बीड — शुक्रवारी सकाळी ड्युटीला घरातून बाहेर पडलेले जीएसटी अधिकारी सचिन जाधवर घरी परतलेच नाहीत. सकाळी यासंदर्भात पोलिसात तक्रार दाखल करण्यात आली होती त्यानंतर त्यांचा मृतदेह कपिलधारवाडीकडे जाणाऱ्या रस्त्याच्या कमानीजवळ कारमध्ये आढळून आला. अधिकाऱ्याच्या या संशयास्पद मृत्यूच्या घटनेने खळबळ माजली आहे.
सचिन नारायण जाधवर वय 45 वर्ष रा.चूंब ता बार्शी, ह.मू. बीड असे मृत अधिकाऱ्याचे नाव आहे.जाधवर हे वस्तू व सेवा कर विभागात महत्त्वाच्या पदावर कार्यरत होते.सचिन जाधवर हे शुक्रवारी रात्रीपासून बेपत्ता होते.ते घरी न परतल्याने आणि त्यांचा संपर्क होऊ न शकल्याने कुटुंबीय काळजीत होते. रात्रभर शोध घेऊनही ते न सापडल्याने अखेर त्यांच्या नातेवाईकांनी बीडच्या शिवाजीनगर पोलीस ठाण्यात बेपत्ता असल्याची तक्रार दाखल केली.पोलीस जाधवर यांचा शोध घेत असतानाच आज शनिवारी दुपारी एक वाजेच्या सुमारास धुळे-सोलापूर राष्ट्रीय महामार्गालगत असलेल्या कपिलधारकडे जाणाऱ्या रस्त्यावरील कमानी जवळ बायपास रोडवर एक कार संशयास्पद स्थितीत उभी असल्याची माहिती मिळाली.परिसरातील ग्रामस्थांनी ही माहिती बीड ग्रामीण पोलिसांना दिली. माहिती मिळताच पोलीस पथकाने तातडीने घटनास्थळी धाव घेतली. पोलिसांनी घटनास्थळी जाऊन उभ्या असलेल्या चारचाकी गाडीची तपासणी केली असता, गाडीमध्ये सचिन जाधवर यांचा मृतदेह आढळून आला. एका जबाबदार शासकीय अधिकाऱ्याचा मृतदेह अशा प्रकारे महामार्गालगत सापडल्याने पोलिसांनी तात्काळ वरिष्ठ अधिकाऱ्यांना याची माहिती दिली.
जाधवर यांचा मृत्यू नैसर्गिक आहे, की त्यांनी आपल्या आयुष्याची अखेर केली, की हा घातपाताचा प्रकार आहे, याचा तपास पोलीस करत आहेत. नातेवाईकांकडून घातपाताचा संशय व्यक्त केला जात आहे. ते रात्री नेमके कोणाला भेटायला गेले होते? त्यांच्यावर काही मानसिक दडपण होते का? या बाबींचा शोध घेतला जात आहे.या परिसरातील सीसीटीव्ही फुटेज आणि जाधवर यांचे कॉल डिटेल्स तपासण्याचे काम पोलिसांनी करावे अशी नातेवाईकांची मागणी आहे बीड ग्रामीण पोलीस या प्रकरणाचा सखोल तपास करत असून शवविच्छेदन अहवालानंतरच मृत्यूचे खरे कारण समोर येणार आहे.
वरिष्ठ जीएसटी अधिकाऱ्याचा मृतदेह कारमध्ये आढळला; घातपाताचा संशय
