वाल्मीक कराड वर मकोकाची संक्रांत; परळी शहर झाले अशांत
बीड — वाल्मीक कराड वर मोक्का कायद्यांतर्गत गुन्हा दाखल होताच परळी येथील वातावरण आणखी तापलं आहे. अवघ्या दहा मिनिटात परळी शहर बंद झालं.सकाळपासून पोलीस ठाण्यासमोर वाल्मीक कराडच्या आईने ठिय्या आंदोलन सुरू केलं होतं. काही महिलांसह कार्यकर्त्यांनी आत्मदहन करण्याचा देखील प्रयत्न केला.
खंडणी प्रकरणात वाल्मीक कराडला 14 दिवसांची सीआयडी कोठडी देण्यात आली होती. आज शेवटचा दिवस असल्यामुळे त्याला केज न्यायालयात हजर करण्यात आले होते. दुसरीकडे मात्र परळी सकाळपासून वाल्मीक कराड समर्थकांनी राणी लक्ष्मीबाई टावर वर चढून शोले स्टाईल आंदोलन सुरू केले होते. वाल्मीक कराड वर दाखल केलेला खोटा गुन्हा मागे घेण्यात यावा अशी मागणी करत असताना समर्थकांनी आ.सुरेश धस, आ. संदीप क्षीरसागर, खा. बजरंग सोनवणे यांच्या विरोधात घोषणाबाजी सुरू केली होती. वाल्मीक कराडची आई पारूबाई कराड यादेखील परळी पोलीस ठाण्याच्या बाहेर ठिय्या देऊन समर्थक महिलांसह आंदोलनाला बसलेल्या होत्या. वाल्मीक कराडला केज न्यायालयात हजर केले असता न्यायालयाने त्याला 14 दिवसाची न्यायालयीन कोठडी सुनावली. मात्र मकोका कायद्यांतर्गत वाल्मीक कराड वर गुन्हा दाखल होताच परळी शहरातील वातावरण तणावपूर्ण बनले. वाल्मीक कराड समर्थकांनी रस्त्यावर टायर जाळून वाहतूक ठप्प केली. काही समर्थकांनी अंगावर ज्वलनशील पदार्थ ओतून आत्मदहन करण्याचा प्रयत्न केला. वातावरण इतकं तणावपूर्ण बनलं की अवघ्या दहा मिनिटात परळी शहर बंद झालं. समर्थकांनी परळी शहर बंदची हाक दिली. पोलीस ठाण्यासमोर ठिय्या मांडून बसलेल्या पारूबाई कराड यांची प्रकृती बिघडली असल्याची माहिती मिळत आहे. काही बस गाड्यावर संतप्त कार्यकर्त्यांनी दगडफेक केल्यामुळे बस सेवा बंद ठेवण्याचा निर्णय घेण्यात आला आहे.
