Physical Address
304 North Cardinal St.
Dorchester Center, MA 02124
गेवराई घराला आग लागल्याने राठोड तांडा येथील जाधव कुटुंबीयांच मोठं नुकसान झाले…
- जाहिरात -
गेवराई — तालुक्यातील मारफळा गावाजवळील राठोड तांडा येथे बुधवारी रात्री विश्वनाथराव जाधव यांच्या घराला अचानक आग लागली. या आगीत सहा क्विंटल कापूस, संसारोपयोगी साहित्य, कपडे आणि बंगळुरू येथे एमबीबीएसचे शिक्षण घेणाऱ्या मुलाच्या महाविद्यालयीन फीसाठी घरात ठेवलेली तब्बल १० लाख रुपयांची रोकड जळून खाक झाली. या दुर्घटनेत जाधव कुटुंबाचे सुमारे १२ लाख रुपयांचे नुकसान झाले आहे.
दुष्काळाने आधीच शेतकऱ्यांचे कंबरडे मोडले असताना आगीच्या या संकटाने जाधव कुटुंबाचा आधारच हिरावला आहे. मुलाच्या वैद्यकीय शिक्षणासाठी कष्टाने जमवून ठेवलेली रक्कम क्षणात राख झाली. त्यामुळे आर्थिक नुकसानासोबतच मुलाच्या शिक्षणाचा प्रश्नही या कुटुंबासमोर उभा राहिला आहे.
मारफळा गावाजवळील राठोड तांडा येथे विश्वनाथराव जाधव यांचे घर आहे. बुधवारी रात्री कुटुंबातील सदस्यांसह ते घराबाहेर झोपले होते. याचदरम्यान अचानक घराला आग लागल्याचे त्यांच्या निदर्शनास आले. त्यांनी आरडाओरड करून मदतीसाठी आवाज दिला. मात्र, आगीने काही वेळातच रौद्ररूप धारण केले. घरातील कापूस, कपडे, संसारोपयोगी वस्तू आणि रोख रक्कम आगीच्या भक्ष्यस्थानी पडली.
जाधव यांनी मुलाच्या एमबीबीएस शिक्षणाची फी भरण्यासाठी दहा लाख रुपये घरात जपून ठेवले होते. मुलाचे वैद्यकीय शिक्षण पूर्ण व्हावे, या अपेक्षेने शेतात राबून आणि कष्टाने जमवलेली ही रक्कम आगीत जळून गेली. सहा क्विंटल कापसाचेही नुकसान झाले. त्यामुळे आधीच आर्थिक संकटाचा सामना करणाऱ्या या शेतकरी कुटुंबावर मोठा आघात झाला आहे.
गेवराई घराला आग दोन दिवस उलटूनही पंचनामा नाही!
विशेष म्हणजे, एवढी मोठी दुर्घटना घडून दोन दिवस उलटले तरी गेवराईच्या महसूल प्रशासनातील एकाही अधिकाऱ्याने घटनास्थळी भेट देऊन नुकसानीचा पंचनामा केलेला नसल्याची माहिती आहे. त्यामुळे नुकसानग्रस्त जाधव कुटुंबाला शासकीय मदत मिळण्याची प्रक्रिया अद्याप सुरू झालेली नाही.
एकीकडे भीषण दुष्काळामुळे शेतीतून उत्पन्नाची शाश्वती राहिलेली नाही. पिकांचे नुकसान, पाण्याचे दुर्भिक्ष्य आणि आर्थिक विवंचनेतून शेतकरी मार्ग काढत असतानाच जाधव कुटुंबावर आगीचे संकट कोसळले. घरातील संसार उद्ध्वस्त झाला, कापूस गेला आणि मुलाच्या डॉक्टर होण्याच्या स्वप्नासाठी जमवलेली रक्कमही हातातून निसटली.
अशा परिस्थितीत महसूल प्रशासनाने तातडीने घटनास्थळी जाऊन पंचनामा करणे आणि नुकसानग्रस्त कुटुंबाला शासकीय मदत मिळवून देण्यासाठी कार्यवाही करणे आवश्यक आहे. अन्यथा दुष्काळाच्या संकटात सापडलेल्या या कुटुंबाला आगीच्या नुकसानीचाही भार एकट्याने सोसावा लागणार आहे.
हे देखील वाचा: बीड जिल्ह्यातील आणखी ताज्या बातम्या
शासकीय मदतीबाबत अधिक माहितीसाठी बीड जिल्हा प्रशासनाची अधिकृत वेबसाईट पहा.
