माजलगावमध्ये कार-बसमध्ये भीषण धडक; बाप-लेकासह पाच भाविकांचा जागीच मृत्यू

बीड : majalgaon accident ची दुर्दैवी घटना समोर आली आहे. तुळजाभवानी देवीच्या दर्शनासाठी निघालेल्या भाविकांच्या कारला भीषण अपघात झाल्याची हृदयद्रावक घटना बीड जिल्ह्यातील माजलगाव तालुक्यात घडली. खामगाव-पंढरपूर राष्ट्रीय महामार्गावर शिंदेवाडी फाट्याजवळ रविवारी सकाळी साडेअकराच्या सुमारास खासगी कार आणि महाराष्ट्र राज्य परिवहन महामंडळाच्या (एसटी) बसची समोरासमोर धडक झाली. या दुर्घटनेत बाप-लेकासह पाच जणांचा जागीच मृत्यू झाला, तर एक जण गंभीर जखमी झाला आहे.

खड्डा चुकवताना कारची बसला धडक?

मिळालेल्या प्राथमिक माहितीनुसार, majalgaon accident हा रस्त्यावरील खड्ड्यामुळे झाला असावा असा प्राथमिक अंदाज आहे. माजलगाव शहरातील नामदास कुटुंबीय आणि त्यांचे सहकारी रविवारी सकाळी खासगी कारने तुळजापूर येथील तुळजाभवानी देवीच्या दर्शनासाठी निघाले होते. माजलगाव तालुक्यातील शिंदेवाडी फाट्याजवळील पेट्रोल पंप परिसरात रस्त्यावरील खड्डा चुकवण्याच्या प्रयत्नात कार आणि एसटी बस यांच्यात जोरदार धडक झाली.

प्रत्यक्षदर्शींनी दिलेल्या माहितीनुसार, धडक इतकी भीषण होती की कारचा अक्षरशः चक्काचूर झाला. कारमधील पाच जणांचा घटनास्थळीच मृत्यू झाला. अपघाताची माहिती मिळताच माजलगाव पोलिसांनी घटनास्थळी धाव घेतली. स्थानिक नागरिकांच्या मदतीने बचावकार्य करण्यात आले. मृत आणि जखमींना तातडीने जवळच्या ग्रामीण रुग्णालयात नेण्यात आले. तेथे पाच जणांना मृत घोषित करण्यात आले, तर गंभीर जखमीवर उपचार सुरू करण्यात आले.

मृतांमध्ये बाप-लेकाचाही समावेश

या majalgaon accident मध्ये मृत्यू झालेल्यांची नावे पुढीलप्रमाणे आहेत.

– ओमकार महादेव गिरी (वय २४)
– गजानन महादेव नामदास (वय ३८)
– माऊली गजानन नामदास (वय ११)
– सोमनाथ बडे (वय २३)
– अनिल आचार्य (वय ४०)

गजानन महादेव नामदास आणि त्यांचा मुलगा माऊली नामदास यांचा या दुर्घटनेत मृत्यू झाल्याने परिसरात हळहळ व्यक्त होत आहे. एकाच कुटुंबातील बाप-लेकाचा मृत्यू झाल्याने नामदास कुटुंबावर दुःखाचा डोंगर कोसळला आहे. या घटनेमुळे संपूर्ण माजलगाव शहरात शोककळा पसरली आहे.

पोलिस तपास आणि जखमीची प्रकृती

माजलगाव पोलिसांनी या प्रकरणी अकस्मात मृत्यूची नोंद केली आहे. एसटी बस चालकाचे जबाब नोंदवण्याचे काम सुरू आहे. जखमी व्यक्तीची प्रकृती चिंताजनक असून त्याला पुढील उपचारासाठी बीड जिल्हा रुग्णालयात हलवण्यात आले आहे. पोलिस पुढील तपास करत आहेत.

माजलगाव-तेलगाव मार्गावरील खड्ड्यांचा प्रश्न पुन्हा ऐरणीवर

नवरात्रोत्सवाच्या पार्श्वभूमीवर तुळजाभवानी देवीच्या दर्शनासाठी राज्याच्या विविध भागांतून भाविक तुळजापूरकडे जात आहेत. माजलगाव, परभणी आणि हिंगोली परिसरातील भाविकांसाठी माजलगावमार्गे तेलगाव, धारूर आणि कळंब या मार्गांचा वापर केला जातो. हा majalgaon accident त्याच मार्गावर झाला आहे.

दरम्यान, माजलगाव आणि तेलगाव मार्गावर रस्त्याला मोठ्या प्रमाणात भेगा पडल्याची माहिती आहे. या मार्गावर यापूर्वीही अपघात घडल्याचे सांगितले जाते. खड्ड्यांमुळे वाहन चालवणे धोकादायक बनले आहे. त्यामुळे रस्त्यांची दुरवस्था आणि वाहनचालकांच्या सुरक्षिततेचा प्रश्न पुन्हा ऐरणीवर आला आहे. सार्वजनिक बांधकाम विभागाने तातडीने रस्ते दुरुस्त करावेत, अशी मागणी नागरिकांमधून होत आहे.

तुळजाभवानी देवीच्या दर्शनासाठी निघालेल्या भाविकांवर काळाने घाला घातल्याने माजलगाव परिसरात शोककळा पसरली आहे. या भीषण अपघातामुळे रस्त्यांची स्थिती आणि सुरक्षित प्रवासासाठी आवश्यक उपाययोजनांकडे लक्ष देण्याची गरज अधोरेखित झाली आहे.

Majalgaon accident: रस्त्यांचा प्रश्न बिकट

बीड जिल्ह्यात राष्ट्रीय महामार्गांचा प्रश्न बिकट बनला आहे. नुसता माजलगाव तेलगाव हाच रस्ता नाही तर अहमदपूर ते अहिल्यानगर हा  रस्ता देखील अपघाताला निमंत्रण देणारा बनला आहे. या सिमेंट रस्त्याला मोठमोठ्या भेगा पडलेल्या असताना गुत्तेदाराने त्यामध्ये डांबर ओतून डागडुजी करत ठिगळ लावण्याचे काम करत बोगसगिरी केली. ठिगळ लावून रस्ता दुरुस्त करण्याचा प्रयत्न केला असला तरी तो आणखी धोकेदायक बनला आहे. या महामार्गावर देखील सातत्याने अपघात होऊन अनेकांचे बळी जात आहेत. गुत्तेदाराच्या बोगसगिरी संदर्भात अनेक वेळा आवाज उठवून देखील संबंधित प्राधिकरणाने याकडे दुर्लक्ष केल्याचे चित्र पाहायला मिळाले आहे. महामार्गाच्या मधोमध मोठमोठ्या भेगा असल्याने दुचाकीस्वारांना या रस्त्यावरून जाताना कसरत करणं हे नेहमीच बनलं आहे. या भेगांमध्ये दुचाकीचं टायर कधी अडकेल व जीव गमववा लागेल हे सांगणं अवघड बनला आहे. या प्रश्नावर माध्यमांनी देखील अनेक वेळा आवाज उठवला. अनेक वेळा आंदोलन झाली मात्र अद्यापही स्थिती जैसी तेच आहे. विशेष बाब म्हणजे रात्रीच्या वेळी अपघात घडला तर अपघात झालेल्या लोकांना मदत मिळणं देखील अवघड होऊन बसलेला आहे. हा महामार्ग नुकताच झालेला असला तरी “महामार्गांचा विकास की महामार्गावरील भेगांचा विकास”झाला असं म्हणण्याची वेळ येथील जनतेवर येऊन ठेपली आहे. बीड जिल्ह्यात महामार्गावर होणाऱ्या अपघातांचा विचार केला तर आता तरी महामार्ग विकास प्राधिकरण याकडे लक्ष देणार का असा प्रश्न उपस्थित केला जात आहे.

हेही वाचा: बीड जिल्ह्यातील इतर महत्त्वाच्या बातम्या वाचण्यासाठी येथे क्लिक करा: https://sahyadrimajha.co.in/category/beed/