बीडमध्ये म्हैस चोर पकडला; चोरीचे तीन गुन्हे उघड

बीड — सिरसाळा पोलीस ठाण्याच्या हद्दीत झालेल्या म्हैस चोरीच्या गुन्ह्याचा स्थानिक गुन्हे शाखेने छडा लावला आहे. या प्रकरणी मुंजा भगवान मोरे (वय 26, रा. कारी, ता. धारूर, जि. बीड) याला मोटारसायकलसह ताब्यात घेऊन अटक करण्यात आली आहे. आरोपीकडून चौकशीत तीन चोरीचे गुन्हे उघडकीस आले असून सुमारे 70 हजार रुपयांचा मुद्देमाल जप्त करण्यात आला आहे.

सिरसाळा पोलीस ठाण्यात गुन्हा क्रमांक 244/2026 अन्वये भारतीय न्याय संहितेच्या कलम 303(2) नुसार म्हैस चोरीचा गुन्हा दाखल झाला होता. या गुन्ह्याचा समांतर तपास सिरसाळा पोलीस आणि स्थानिक गुन्हे शाखा बीड यांच्याकडून सुरू होता.
दरम्यान, 23 ऑगस्ट रोजी स्थानिक गुन्हे शाखेच्या पथकाला गुप्त बातमीदारामार्फत मुंजा मोरे हा म्हैस चोरीच्या गुन्ह्यात सहभागी असून तो म्हतारगाव परिसरात असल्याची माहिती मिळाली. माहितीच्या आधारे पथकाने कारवाई करत त्याला मोटारसायकलसह ताब्यात घेतले.
चौकशीदरम्यान आरोपीने सिरसाळा हद्दीतील म्हैस चोरी केल्याची कबुली दिल्याचे पोलिसांनी सांगितले. अधिक चौकशी केली असता त्याने केज पोलीस ठाण्याच्या हद्दीतील केवड गावातूनही म्हैस चोरी केल्याचे उघड झाले. तसेच त्याच्याकडील मोटारसायकलबाबत चौकशी केली असता तीही परंडा येथून चोरी केल्याचे तपासात समोर आले.
या कारवाईमुळे सिरसाळा, केज आणि परंडा पोलीस ठाण्याच्या हद्दीतील चोरीचे तीन गुन्हे उघडकीस आले आहेत. आरोपीला पुढील तपासासाठी सिरसाळा पोलिसांच्या ताब्यात देण्यात आले आहे.
ही कारवाई पोलीस अधीक्षक नवनीत, अपर पोलीस अधीक्षक चेतना आणि पोलीस निरीक्षक शिवाजी बंटेवाड यांच्या मार्गदर्शनाखाली करण्यात आली. स्थानिक गुन्हे शाखेचे पोलीस उपनिरीक्षक महेश विघ्ने, पोलीस हवालदार बप्पासाहेब घोडके, महेश जोगदंड, जफर पठाण आणि चालक पोलीस हवालदार गणेश मराडे यांच्या पथकाने ही कारवाई केली.