संतोष देशमुख हत्या प्रकरणातील आरोपी बाहेर आल्यास राज्य बंद; मनोज जरांगेंचा इशारा

बीड — सरपंच संतोष देशमुख हत्या प्रकरणाला एक वर्ष पूर्ण होत असून यातील आरोपी लवकरच सुटून येणार असल्याचं सांगितलं जात आहे. असं जर झालं तर त्याच दिवशी बीड जिल्हा बंद करण्यात येईल त्यानंतर राज्यही बंद करण्यात येईल असा इशारा मनोज जरांगे पाटील यांनी दिला आहे. त्यांनी आज मसाजोग मध्ये संतोष देशमुख कुटुंबीयांची त्यांनी भेट घेतली.
जरांगे पाटील यांनी सांगितले की, मुख्यमंत्र्यांनी एक वर्षाच्या आत आरोपींना फाशी दिली जाईल असे आश्वासन दिले होते, मात्र आता या तपासात विलंब होत असून प्रकरण मुद्दाम लांबवले जात असल्याची शंका निर्माण होत आहे.
त्यांनी स्पष्ट केले की संतोष देशमुख यांच्या लहान मुलांना आज वडील दिसत नाहीत, त्यामुळे आरोपींना कठोर शिक्षा होईपर्यंत समाधान मिळणार नाही. काही लोकांना “आरोपी सुटणार आहे” अशा अफवा पसरवण्यास सांगितले जात असल्याचा गंभीर आरोप त्यांनी केला. यावेळी त्यांनी परळीकर असा उल्लेख केला.
जरांगे पाटील यांनी इशारा दिला की, ज्या दिवशी या प्रकरणातील आरोपीला मुक्त केले जाईल, त्या दिवशी जिल्हा बंद करण्यात येईल आणि त्यानंतर राज्यही बंद करण्याची वेळ येईल. जरांगेंनी सरकारला प्रश्न केला की, काहीजण अशा प्रकारे वातावरण निर्मिती करतात आणि सरकारला अडचणीत टाकण्याचे वक्तव्य का करतात, हे शोधण्याची गरज आहे.
“आरोपी सुटणार नाही, हे सत्य आहे,” असे ते म्हणाले. तसेच, हा सगळा प्रकार काही व्यक्तींनी आखून आणल्याचा त्यांनी दावा केला आहे.
जरांगे पाटील म्हणाले की, तपास सुरुवातीला वेगाने सुरू होता कारण त्यावेळी मुख्यमंत्री देवेंद्र फडणवीस यांनी दिलेला शब्द महत्त्वाचा होता आणि नागरिक शांत राहिले होते. आता त्यात गती मंदावली असल्याचे दिसत आहे असंही त्यांनी सांगितले आहे.

त्यांनी यावेळी क्रूर कृत्य करणारे आरोपी बाहेर फिरत आहेत आणि कृष्णा आंधळे अद्याप सापडत नसल्याची खंतही व्यक्त केली. “हत्या करताना आंधळे व्हिडिओ कॉलवर होता, तो पकडला तर मोठा उलगडा होईल,” असे त्यांनी नमूद केले.
विधानसभेच्या अधिवेशनातही या प्रकरणाचा उल्लेख झाल्याचे सांगत त्यांनी सरकारने या केसचा निकाल चार ते पाच महिन्यांत निघावा अशी मागणी केली.अशा लोकांना संरक्षण दिले तर आम्हाला अजित पवारांचा राग येणारच. चुकीच्या व्यक्तीला जवळ करण्याचे पाप करू नका,” अशी टीका त्यांनी केली.