शिरूरमध्ये पाणबुडी मोटार चोरीचा छडा; चार आरोपी निष्पन्न, चोरीचा मुद्देमाल जप्त

बीड — शिरूर पोलीस ठाण्याच्या हद्दीतील तागडगाव परिसरात पाणबुडी मोटार चोरीच्या दोन घटना घडल्या होत्या. या प्रकरणांचा स्थानिक गुन्हे शाखा, बीड यांनी समांतर तपास करत दोन्ही गुन्ह्यांचा छडा लावला आहे. तपासादरम्यान एकूण चार आरोपी निष्पन्न झाले असून चोरीला गेलेल्या पाणबुडी मोटारी पोलिसांनी हस्तगत केल्या आहेत.

शिरूर पोलीस ठाण्यात दाखल असलेल्या गु.र.नं. १९८/२०२६, कलम ३०३ (२) बी.एन.एस. या गुन्ह्याचा तपास करताना स्थानिक गुन्हे शाखेच्या पथकाने आरोपींची माहिती मिळवली.

या तपासात योगेश गोरख पोकळे (वय ३६), राजेश रंगनाथ तांबारे (वय २२) आणि सलिम बानूभाई शेख (वय ३०), तिघेही रा. तागडगाव, ता. शिरूर, जि. बीड, यांचा पाणबुडी मोटार चोरीच्या घटनेत सहभाग निष्पन्न झाला.

तपासात चोरी केलेल्या पाणबुडी मोटारी भरत रामभाऊ पवार (वय ३८, रा. तागडगाव) याला विकण्यात आल्याचे समोर आले. त्यानंतर पोलिसांनी चोरीचा मुद्देमाल हस्तगत केला.

दरम्यान, शिरूर पोलीस ठाण्यात दाखल असलेल्या गु.र.नं. २०१/२०२६, कलम ३०३ (२) बी.एन.एस. या आणखी एका पाणबुडी मोटार चोरीच्या गुन्ह्यातही याच चार आरोपींचा सहभाग असल्याचे तपासात निष्पन्न झाले आहे.

दोन्ही गुन्ह्यांतील आरोपींविरुद्ध शिरूर पोलीस ठाण्यात कलम ३०३ (२) बी.एन.एस. अन्वये पुढील कायदेशीर कार्यवाही सुरू आहे.

पोलिसांच्या पथकाचे कामगिरी

ही कारवाई बीडचे पोलीस अधीक्षक नवनीत, अपर पोलीस अधीक्षक समीर  आणि आष्टीचे उपविभागीय पोलीस अधिकारी विश्वजित यांच्या मार्गदर्शनाखाली करण्यात आली.

स्थानिक गुन्हे शाखेचे शिवाजी बंटेवाड यांच्या नेतृत्वाखाली पोउपनि. शेखर औटे, पोलीस हवालदार अशोक दुबाले, आनंद मस्के, सोमनाथ गायकवाड, बालासाहेब सानप, पोलीस अंमलदार अश्विनकुमार सुरवसे आणि चालक पोलीस शिपाई सिद्धार्थ मांजरे यांच्या पथकाने ही कारवाई केली.