मालक उपचारासाठी बाहेर, मुनीमाने कोरे चेक वापरून 34 लाख लाटले

केज — केज येथे विश्वासाच्या नात्याला काळिमा फासणारी धक्कादायक घटना समोर आली आहे. धान्य व्यापाऱ्याच्या व्यवसायातील सर्व आर्थिक व्यवहार सांभाळणाऱ्या विश्वासू मुनीमानेच मालकाच्या स्वाक्षरीचे कोरे धनादेश (चेक) चोरून 34 लाख रुपयांची फसवणूक केल्याचा प्रकार उघडकीस आला आहे. एवढ्यावरच न थांबता दुकानातील 500 ते 600 पोती सोयाबीनची परस्पर विक्री करून 30 ते 40 लाख रुपयांचा अपहार केल्याचाही आरोप करण्यात आला आहे. याप्रकरणी केज पोलीस ठाण्यात गुन्हा दाखल करण्यात आला असून आरोपी फरार झाला आहे.
फिर्यादी हाजी मौला सालेमसाहब सौदागर (वय 65, रा. समता नगर, केज) हे केज मार्केट यार्ड परिसरात ‘सौदागर ट्रेडिंग कंपनी’ या नावाने धान्य खरेदी-विक्रीचा व्यवसाय करतात. व्यवसायाचा विस्तार वाढल्याने आर्थिक व्यवहार, बँकेची कामे आणि हिशोब सांभाळण्यासाठी त्यांनी ऑक्टोबर 2022 मध्ये धारूर येथील शेख अतिक याला महिन्याकाठी 20 हजार रुपये पगारावर मुनीम म्हणून कामावर ठेवले होते. कामातील प्रामाणिकपणा आणि विश्वासार्ह वर्तनामुळे त्याने मालकाचा पूर्ण विश्वास संपादन केला होता.

उपचारासाठी राजस्थानला गेल्यानंतर साधला डाव

फिर्यादी हाजी मौला सौदागर यांची प्रकृती बिघडल्याने त्यांना उपचारासाठी राजस्थान येथे जावे लागले. 17 जून 2026 रोजी रवाना होण्यापूर्वी त्यांनी आपल्या मुलाकडे देण्यासाठी स्वाक्षरी केलेले चार कोरे धनादेश (क्रमांक 587270, 587271, 587274 आणि 587275) आरोपी शेख अतिक याच्याकडे दिले होते. हे धनादेश मुलाकडे पोहोचविण्याऐवजी आरोपीने स्वतःजवळच ठेवून त्यांचा गैरवापर करण्याचा कट रचल्याचा आरोप आहे.

बँकेच्या फोनने उघडकीस आला प्रकार

दरम्यान, 23 जून 2026 रोजी फिर्यादींना बँकेतून फोन आला. त्यांच्या खात्यातून 34 लाख रुपये वळते झाल्याची माहिती बँकेने दिली. ही माहिती मिळताच त्यांना मोठा धक्का बसला. त्यानंतर खात्याची तपासणी केली असता आरोपी शेख अतिक याने चारही धनादेशांचा वापर करून ती रक्कम स्वतःच्या तसेच त्याच्या नातेवाईकांच्या खात्यावर जमा करून परस्पर काढून घेतल्याचे समोर आले.

सोयाबीन विक्रीतही लाखोंचा अपहार

फसवणुकीची माहिती समोर आल्यानंतर व्यवसायातील इतर व्यवहारांची पडताळणी करण्यात आली. त्यावेळी दुकानातील 500 ते 600 पोती सोयाबीन परस्पर विकून त्यातून अंदाजे 30 ते 40 लाख रुपयांचा अपहार केल्याचाही प्रकार उघड झाल्याचा आरोप फिर्यादीने तक्रारीत केला आहे. त्यामुळे एकाच आरोपीने व्यापाऱ्याला अनेक मार्गांनी आर्थिक फटका दिल्याचे समोर आले आहे.

मोबाईल बंद करून आरोपी फरार

घटना उघडकीस येताच आरोपी शेख अतिक याने आपला मोबाईल बंद केला आणि फरार झाला. राजस्थानहून 27 जून रोजी परतल्यानंतर फिर्यादींनी त्याचा शोध घेतला, मात्र तो मिळून आला नाही. अखेर त्यांनी केज पोलीस ठाण्यात धाव घेत तक्रार दाखल केली.

पोलिसांकडून तपास सुरू

फिर्यादीच्या तक्रारीवरून केज पोलीस ठाण्यात आरोपी शेख अतिक याच्याविरुद्ध फसवणूक, विश्वासघात व संबंधित कलमान्वये गुन्हा दाखल करण्यात आला आहे. आरोपीचा शोध घेण्याचे काम सुरू असून, बँक व्यवहार, धनादेशांचा वापर आणि सोयाबीन विक्री संदर्भातील आर्थिक व्यवहारांचीही पोलिसांकडून सखोल चौकशी करण्यात येत आहे.
व्यापारातील आर्थिक व्यवहारांमध्ये विश्वासू व्यक्तीकडूनच एवढ्या मोठ्या प्रमाणावर फसवणूक झाल्याने केजमधील व्यापारी वर्तुळात या घटनेची मोठी चर्चा सुरू आहे.