बीडमध्ये किराणा दुकानांवर डल्ला मारणाऱ्या अल्पवयीन टोळीचा पर्दाफाश

बीड — बीड शहरातील किराणा दुकानांमध्ये सातत्याने होत असलेल्या चोरीच्या घटनांचा अखेर शिवाजीनगर पोलिसांनी यशस्वी उलगडा केला आहे. या प्रकरणात एका विधी संघर्षग्रस्त बालकाला ताब्यात घेण्यात आले असून, त्याला किशोर न्याय मंडळासमोर हजर करण्यात येणार आहे. या कारवाईनंतर चोरीच्या आणखी अनेक घटनांचा उलगडा होण्याची शक्यता पोलिसांनी व्यक्त केली आहे.

तपासादरम्यान समोर आलेल्या माहितीनुसार, संबंधित बालक हा किराणा दुकानांमध्ये चोरी करणाऱ्या अल्पवयीन मुलांच्या टोळीचा प्रमुख होता. तो १४ ते १५ वर्षे वयोगटातील इतर मुलांना सोबत घेत असे. विशेष म्हणजे, पालकांची मोटारसायकल उपलब्ध असलेल्या मुलांचाच तो साथीदार म्हणून वापर करत होता.

टोळीची चोरी करण्याची पद्धतही अत्यंत चलाख होती. साथीदार मुलांना दुकानात अशी वस्तू मागण्यास सांगितले जात असे की, ती आणण्यासाठी दुकानदाराला दुकानाच्या मागील भागात जावे लागे. दुकानदार मागे गेल्यानंतर मुख्य आरोपी गल्ला उघडून त्यातील रोख रक्कम चोरत असे आणि काही क्षणांतच साथीदारांसह मोटारसायकलवरून पसार होत असे. या पद्धतीने शहरातील अनेक किराणा दुकानांमध्ये चोरी केल्याची कबुली प्राथमिक चौकशीत समोर आली आहे.

पोलिसांच्या चौकशीत या गुन्ह्यांमध्ये आणखी तीन ते पाच अल्पवयीन मुलांचा सहभाग असल्याची माहिती मिळाली असून, त्यांचा शोध सुरू आहे. या कारवाईमुळे शहरातील चोरीच्या घटनांवर आळा बसण्यास मदत होईल, असा विश्वास पोलिसांनी व्यक्त केला आहे.

ही कारवाई पोलीस अधीक्षक नवनीत कावत, अप्पर पोलीस अधीक्षक समीर शेख आणि उपविभागीय पोलीस अधिकारी वेंकटराम यांच्या मार्गदर्शनाखाली करण्यात आली. पोलीस निरीक्षक शीतलकुमार बल्लाळ यांच्या नेतृत्वाखाली डी.बी. पथकाने कौशल्यपूर्ण तपास करत हा गुन्हा उघडकीस आणला. या मोहिमेत स.पो.नि. गुंजाळ तसेच बाळकृष्ण राहडे, सुदर्शन ठोसर, अनंत गिरी, सचिन आगलावे आणि अनिल घटमळ यांनी महत्त्वाची भूमिका बजावली.

दरम्यान, संशयास्पद हालचाली किंवा चोरीसंदर्भातील कोणतीही माहिती तातडीने पोलिसांना कळविण्याचे आवाहन शिवाजीनगर पोलिसांनी नागरिकांना केले आहे.