पत्नी FB लाइव्ह करत होती,पतीच्या अंगावर ट्रॉली कोसळली; ऊसतोड कामगार रीलस्टारचा मृत्यू

बीड — ट्रॅक्टर ट्रॉली अंगावर कोसळल्याने ऊसतोड कामगाराचा जागीच मृत्यू झाल्याची दुर्दैवी घटना घडली. गणेश डोंगरे असं ऊसतोड कामगाराच नाव असून तो रीलस्टारही होता. जेव्हा घटना घडली तेव्हा गणेशची पत्नी अश्विनी फेसबुक लाइव्ह करत होती.तिच्या डोळ्यादेखतच ही दुर्घटना घडली. तिला लक्षात आलं तेव्हा लाइव्हमध्येच ती किंचाळल्याचंही ऐकू येतं.
वडवणी तालुक्यातील डोंगऱ्याचीवाडी सोन्नाखोटा येथील रहिवाशी असणारा गणेश डोंगरे वय 30 वर्ष आणि त्यांची पत्नी ऊसतोडीसाठी लातूरच्या कारखान्यावर गेले होते. कारखान्याजवळ ते थांबले असताना गणेश डोंगरे याच्या अंगावर ट्रॅक्टर ट्रॉली कोसळली. गणेशच्या अशा अकाली मृत्यूमुळे त्याची पत्नी, तीन मुली आणि आई-वडिलांवर दु:खाचा डोंगर कोसळला.

गणेश डोंगरे याची घरची शेती अवघी एक एकर इतकी होती. गणेशवरच कुटुंबाची जबाबदारी होती. त्याची पत्नीही त्याला ऊसतोडीसह कष्टाच्या कामात साथ देत होती. गावी पत्र्याच्या शेडमध्ये राहणाऱ्या गणेश-अश्विनीने ऊस तोडणीही सुरू केली होती. अश्विनी आणि गणेश हे त्यांचे व्हिडीओ शेअर करायचे. ऊसतोडणी करत ज्या परिस्थितीत आपण राहतोय, आपण जे काम करतोय ते दोघंही दाखवत असत.
लातूर जिल्ह्यात साखर कारखान्यावर ऊसतोडीसाठी गणेश आणि अश्वीनी आले होते. शनिवारी दुपारी गणेश आणि अश्विनी ट्रॅक्टर भरून साखर कारखान्यावर पोहोचले होते. वजनासाठी ते कारखाना परिसरात थांबले असताना एक ट्रॅक्टर पलटी झाला. तो गणेश यांच्या अंगावर कोसळल्यानं त्यांचा जागीच मृत्यू झाला तर एक जण जखमी झाला. घटना घडली तेव्हा गणेश यांची पत्नी अश्विनी कारखाना परिसरात फेसबुक लाइव्ह करत होती.