Physical Address
304 North Cardinal St.
Dorchester Center, MA 02124
बीड — धुळे-सोलापूर महामार्गावरून विनापरवाना वाळूची वाहतूक करणाऱ्या ट्रकवर बीड स्थानिक गुन्हे शाखेने कारवाई केली. गेवराई परिसरातील हॉटेल डिसेंटसमोर पहाटे केलेल्या या कारवाईत सुमारे 15 ब्रास वाळूसह अशोक लेलँड ट्रक असा एकूण 35 लाख 90 हजार रुपयांचा मुद्देमाल पोलिसांनी जप्त केला. याप्रकरणी दोन जणांविरुद्ध गेवराई पोलीस ठाण्यात गुन्हा दाखल करण्यात आला आहे.
स्थानिक गुन्हे शाखेचे पोलीस निरीक्षक शिवाजी बंटेवाड यांच्या आदेशानुसार पोलीस उपनिरीक्षक शेखर औटे यांच्या पथकाकडून गेवराई परिसरात अवैध धंद्यांविरोधात पेट्रोलिंग सुरू होते. यावेळी धुळे-सोलापूर महामार्गावरील हॉटेल डिसेंटसमोर एका ट्रकमधून विनापरवाना वाळूची वाहतूक सुरू असल्याची माहिती पथकाला मिळाली.
माहितीच्या आधारे पोलिसांनी पंचांसमक्ष पहाटे सुमारे 2.30 वाजता छापा टाकला. यावेळी अशोक लेलँड कंपनीचा केशरी रंगाचा MH-26-BE-0115 क्रमांकाचा ट्रक ताब्यात घेण्यात आला. वाहनाची तपासणी केली असता त्यामध्ये अंदाजे 15 ब्रास वाळू आढळून आली. वाळू वाहतुकीसाठी आवश्यक परवाना किंवा पास नसल्याचे वाहनातील व्यक्तींनी पोलिसांना सांगितले.
या प्रकरणात जितेंद्र राजेंद्र नेमाणे (23) आणि गणेश राजेंद्र नेमाणे (24), दोघे रा. नारायणगाव, ता. अंबड, जि. जालना, यांना पोलिसांनी ताब्यात घेतले. ट्रक आणि वाळू असा एकूण 35 लाख 90 हजार रुपये किमतीचा मुद्देमाल जप्त करण्यात आला.
याप्रकरणी गेवराई पोलीस ठाण्यात गुन्हा क्रमांक 503/2026 नुसार भारतीय न्याय संहितेतील कलम 303(2), 3(5) अन्वये गुन्हा दाखल करण्यात आला असून पुढील तपास सुरू आहे.
ही कारवाई बीडचे पोलीस अधीक्षक नवनीत, अपर पोलीस अधीक्षक समीर आणि गेवराईचे उपविभागीय पोलीस अधिकारी अनिल यांच्या मार्गदर्शनाखाली स्थानिक गुन्हे शाखेचे पोलीस निरीक्षक शिवाजी बंटेवाड यांच्या नेतृत्वाखाली करण्यात आली. पोलीस उपनिरीक्षक शेखर औटे, पोलीस अंमलदार मनोज परजणे, बबन सलगर आणि अश्पाक सय्यद यांच्या पथकाने ही कारवाई केली.
