गर्दीचा फायदा घेत बसमध्ये सोन्याची पोत लंपास; महिला चोरट्यास बेड्या

बीड — बसमध्ये चढताना झालेल्या गर्दीचा फायदा घेत महिलेच्या गळ्यातील सोन्याची पोत चोरणाऱ्या महिलेला बीड स्थानिक गुन्हे शाखेने अवघ्या एका दिवसात जेरबंद केले. शोभा संजय भालेराव (रा. रमाई चौक, खंडेश्वरी पेठ, बीड) असे ताब्यात घेतलेल्या महिलेचे नाव असून, तिच्याकडून सुमारे १ लाख ५० हजार रुपये किमतीची सोन्याची पोत मण्यांसह जप्त करण्यात आली आहे.

मांजरसुंबा पुलाखाली बसमध्ये चढताना चोरी

नेकनूर पोलीस ठाण्याच्या हद्दीतील मोरगाव येथील आसाराम बाबासाहेब कागदे हे १२ ऑगस्ट रोजी सकाळी सुमारे ९ वाजता पत्नीसमवेत देवदर्शनासाठी जात होते. माजरसुंबा पुलाखाली बसमध्ये चढत असताना गर्दीचा फायदा घेत अज्ञात व्यक्तीने त्यांच्या पत्नीच्या गळ्यातील एक तोळा वजनाची सोन्याची पोत मण्यांसह लंपास केली.
या घटनेनंतर नेकनूर पोलीस ठाण्यात अज्ञात चोरट्याविरुद्ध गुन्हा क्रमांक ३३१/२०२६, कलम ३०३(२) भारतीय न्याय संहिता अन्वये गुन्हा दाखल करण्यात आला.

तांत्रिक माहिती आणि गुप्त बातमीदाराच्या मदतीने आरोपीचा शोध

गुन्ह्याचा समांतर तपास नेकनूर पोलीस आणि बीड स्थानिक गुन्हे शाखेकडून सुरू होता. १३ ऑगस्ट रोजी स्थानिक गुन्हे शाखेच्या पथकाने घटनास्थळी भेट देऊन उपलब्ध तांत्रिक माहितीच्या आधारे तपासाला वेग दिला.
दरम्यान, गुप्त बातमीदारामार्फत सदर चोरी शोभा संजय भालेराव हिने केल्याची माहिती पोलिसांना मिळाली. त्यानुसार पोलिसांनी रमाई चौक, खंडेश्वरी पेठ येथील तिच्या घरी जाऊन तिला ताब्यात घेतले.
महिला पोलीस कर्मचाऱ्यांनी विश्वासात घेऊन चौकशी केली असता तिने चोरीची कबुली दिल्याचे पोलिसांनी सांगितले. तिच्याकडून चोरीस गेलेली एक तोळा वजनाची सोन्याची पोत मण्यांसह, अंदाजे १.५० लाख रुपये किमतीची, जप्त करण्यात आली.

स्थानिक गुन्हे शाखेची कारवाई

ही कारवाई पोलीस अधीक्षक नवनीत, अप्पर पोलीस अधीक्षक अंबाजोगाई व बीड, उपविभागीय पोलीस अधिकारी केज व बीड आणि पोलीस निरीक्षक शिवाजी यांच्या मार्गदर्शनाखाली करण्यात आली.
स्थानिक गुन्हे शाखेचे पोलीस उपनिरीक्षक महेश , पोलीस हवालदार महेश, बप्पासाहेब, दिलीप, महिला पो ह. स्वाती आणि चालक पो. ह. गणेश  यांच्या पथकाने ही कारवाई केली. प्रकरणाचा पुढील तपास नेकनूर पोलीस करीत आहेत.