अंबाजोगाईच्या स्वाराती रुग्णालयातही दोन कोरोना बाधित रुग्णांचा मृत्यू

बीड — कोरोनामुळे जिल्ह्यात मृत्यूचे प्रमाण वाढत असतानाच स्वामी रामानंद तीर्थ रुग्णालयात आणखी दोघांचा मृत्यू झाला यामध्ये आंबेजोगाई येथील 90 वर्षीय वृद्ध व सिरसाळा येथील 60 वर्षीय व्यक्तीचा समावेश आहे. वाढते मृत्यु रोखण्याचे आरोग्य विभागापूढे आव्हान निर्माण झाले आहे.
बारा तासात दोघा जणांचा मृत्यू झाल्यामुळे जिल्ह्यात मृतांची संख्या आता 24 वर जाऊन पोहोचली आहे.रविवारी 2, सोमवारी 3 , मंगळवारी 2 तर बुधवारी 4 रुग्णांचा मृत्यू झाला. गत चार दिवसात तब्बल 11 रुग्ण दगावल्याने बीड जिल्हा हादरला आहे. गुरुवारी मध्यरात्री अंबाजोगाई शहरातील हाऊसिंग सोसायटीमधील 90 वर्षीय कोरोना बाधित रुग्णाचा मृत्यू झाला. तर परळी तालुक्यामधील 60 वर्षीय इसमास कोरोणा ची लक्षणे दिसत असल्यामुळे परळी येथे त्याचे स्वॅब घेण्यात आले. तसेच पुढील उपचारासाठी अंबाजोगाईच्या स्वाराती रुग्णालयात पाठवण्यात आले . या व्यक्तीच्या स्वॅबचा अहवाल येण्यापूर्वीच त्या व्यक्तीचा मृत्यू झाला. मध्यरात्री त्याचा स्वॅब पॉझिटिव्ह आला आहे. दरम्यान, राज्याचा एकंदरीत कोरोनाग्रस्त रुग्णांचा मृत्यू दर 3.72 इतका असताना बीड जिल्ह्याचा मृत्यूदर मात्र 4.2 च्या पुढे गेला आहे. मृत्यूच्या वाढत्या संख्येने आरोग्य विभागा पुढे नवे आव्हान उभे केले आहे