परळी — घरा शेजारीच राहत असलेल्या १६ वर्षीय अल्पवयीन मुलीस ४० वर्षीय नराधमाने पत्नीच्या संगनमताने लग्नाचे आमिष दाखवत फुस लावून परभणी येथे पळवुन नेले. मुलगी बेपत्ता असल्याची तक्रार मुलीच्या वडिलांनी संभाजीनगर पोलिस ठाण्यात दाखल केल्यानंतर पोलिसांनी मुलीचा शोध घेतला असता हे तिघे जण परभणी येथे असल्याचे उघडकीस आले. पोलिसांनी या तिघांना ताब्यात घेवून नराधमासह त्याच्या पत्नीविरोधात बलात्काराचा गुन्हा दाखल केला आहे. अपहरण करून बलात्कार करण्याची ही दोन दिवसातली ही दुसरी घटना आहे.
बरकत नगर येथील 40 वर्षीय नसीर पाशा पठाण याचे गेल्या काही वर्षापुर्वी लग्न झालेले आहे. लग्न झालेले असतांना देखील त्याने बाजुलाच राहणार्‍या एका १६ वर्षीय मुलीस लग्नाचे अमिष दाखवत पळवून नेले. मुलीला पळवून घेऊन जाण्यात नसीर पाशा पठाण याच्या पत्नीने देखील त्याला सहकार्य केले. दरम्यान मुलगी बेपत्ता असल्याची तक्रार तिच्या वडिलांनी २ जुलै रोजी संभाजीनगर पोलिस ठाण्यात दिली होती. पोलिसांनी या प्रकरणाचा तपास लावला असता हे तिघे जण परभणी येथे असल्याची माहिती मिळाल्यानंतर पोलिस कर्मचारी डी.एस.देशमुख, जमादार शिंदे, महिला कर्मचारी ढोकणे या तिघांनी परभणी येथे जावून संंबंधितांना ताब्यात घेतले. या प्रकरणी नराधम नसीर पठाण याच्यासह त्याच्या पत्नीच्या विरोधात कलम ३६३ भा.दं.वि. ३६६ (अ), ३७६ (एन.) ५०६ भा.दं.वि.सह कलम ४, ८ पोस्को अॅक्ट
नुसार गुन्हा दाखल करण्यात आला आहे. या प्रकरणाचा अधिक तपास संभाजीनगर पोलिस ठाण्याचे बाळासाहेब पवार यांच्या मार्गदर्शनाखाली पोलिस उपनिरीक्षक मेंडके हे करत आहेत.
